طه حسين تاريخ التسجيل : 27/05/2009
| موضوع: مش عارف أسامح السبت نوفمبر 12, 2016 12:33 pm | |
| مش عارف أسامح
فى الأوقات الأخيرة انتشر بوست يقر فيه صاحب الكلام انه مسامح اي حد غلط فيه و انه مش زعلان من حد و لا شايل من حد ..الحقيقة انا مش عارف مين الكاتب الحقيقي للبوست .. لكني من كل قلبي برفعله القبعة و بقوله انت و اللي نقلوا عنك قدروا يعملوا حاجة عظيمة جدا ناس كتير تعجز عنها .. و انا منهم !!دة مش معناه اني شخصية شريرة و لا قلبي مليان كره و غل ..لإني لما راجعت نفسي لقيتني بالفعل مسامح اساءات كتير اوي .. مواقف و تصرفات و أذى من أشخاص كانوا فى يوم قريبين جدا من قلبي .. لدرجة اني فعلا نسيت اي ملامح ليهم أو أي أحساس سلبي ناحيتهم .. لكن فيه نوع من الوجع و الحزن فوق مستوى الغفران .. فوق مستوى قدرتك على المسامحة و النسيان .. يبقى نوع من الإساءة المختلطة بجرح عمره ما يندمل ..وجع ف القلب عمره ما بيتنسي .. ظلم من ناس ... مواقف بتغيرك فعلا من جوا .. بتضلم حتة من قلبك ..بتسرق حتة من روحك .. بتشوه جزء من ملامحك من غير ما تشعر .. فيه نوع من الإساءات ما بنقدرش ننساه أو نسامح اللي عمله ..و خصوصا لما يبقى ممزوج بغدر و إفتراء .. أو يتعدى حدودك ليشمل ناس تانية بتحبهم .. و لو الناس دي كمان لا تملك القدرة على الرد أو الدفاع سواء بالرحيل أو بالعجز لأي سبب .. بتحس وقتها إنك إنت المسئول تجيبلهم حقهم .. هنا بيكون الوجع مضروب ف إتنين و إحساس الغدر و القهر مضروب في عشرة لإنه غالبا بيكون من ناس أبعد ما يكونوا عن توقعاتنا ..صحيح إن ربنا بيغفر .. بس عارف امتى !؟ ..(قلت إستغفروا ربكم إنه كان غفارا ) ...لما تستغفر و تقر بذنبك .. باب التوبة مفتوح ..لكل مستغفر .. إنما المكابرين ..مكانهم الدرك الأسفل من النار .. !العلماء حددوا شروط التوبة في 4 نقط .. - أولها الندم .. - وثانيها الإقلاع عن الذنب .. - وثالثها العزم على عدم العودة .. - ورابعها رد المظالم و خصوصا اذا كانت مادية .. طيب إذا كان رب العباد قالك شروط قبول التوبة و الغفران إولها الندم و آخرها رد المظلمة .. إزاي عايزني أسامح كدة ناس مازالت مكابرة و مستمرة على ظلمي ..ما فكرتش يوم تعتذر ..تقول حقك عليا أنا غلطان ..ترد و لو جزء بسيط من أذاهم ..سيبك من التعويض المادي .. التعويض المعنوي أكبر بكتير .. اللي إتكلم ف حق حد ..اللي شوه سمعة .. اللي وجع قلب حد و جرح كرامته .. اللي أكل حق حد .. اللي غدر بحد مآمن له .. اللي ظلم حد بيحبه ..اللي سرق تعب حد ..اللي إستغفل حد .. اللي وقف لحد ف رزقه و خرب بيته ..اللي خدع ..اللي اكل مال يتيم ...اللي سرق .. اللي شهد زور .. اللي أزهق روح .. و غيرها و غيرها و غيرها ...اللي قدر بالرغم من كل الوجع دة و من غير أي إعتذار أو رد مظلمة .. يسامح و يعفو .. بدعيلك من قلبي ربنا يكرمك و يرفع درجاتك و يثبتك و ينور بصيرتك و يزيدك من سلامك النفسي ... و اللي ماقدرش .. و مش عارف يسامح ...ماتزعلش من نفسك ..و لا تحس إنك أقل منهم إنسانية أو تصالح مع النفس .. إنت بس موجوع و مجروح ..إنت إنسان طبيعي .. لكن هي قدرات (القدرات الفرديه) .. و مستويات من تحمل الوجع تختلف و تتفاوت من شخص للتاني .. درجات الظلم و إستقبالنا ليها برضه متفاوتة ..بس أقولك حاجة تريحك أوي .. ربنا اكبر بكتير من أي وجع و ظلم .. ربنا بيسامح في حقوقه بس مش بيسامح في حقوق عبيده .. ربك إسمه العدل .. حقك هيجيلك هيجيلك ما تخافش .. و هيجبر بخاطرك و هيشفي غليلك و هيطمن قلبك ...عاجلا أو آجلا .. سيبها بس عند اللي أقسم و قال و عزتي و جلالي لأنصرنك و لو بعد حين .. اللي يوم العرض بيقتص حتى للحيوانات من بعض .. ما تخافش و لا تشيل هم .. أقعد بعيد و إتفرج و شوف تدابير أمره .. و أطلب منه إنه ينزل السكينة على قلبك و يشفي غور صدرك .. لأنه هو الوحيد اللي يقدر يشفي قلوبنا و يرزقنا نعمة النسيان ..سيبها عليه ..صدقني إنتقامه أكبر و أقوى و أقرب مما تتخيل ... أطلب منه يرزقك الصبر .. و الحكمة إنك تشوف بعينك و تدرك بقلبك حكمته و تدابيره .. أطلب منه فرحة و فرجة لكل كرب .. أطلب من قلبك و ماتتكسفش ..قوله يا رب مظلوم و ضعيف و إنت رب المستضعغين .. قوله انت حسبي و وكيلي فدبرلي أمري فإني لا أحسن التدبيرا .. قوله كدة و إنت على يقين إنه سامعك و شايفك و مدبر الكون كله هيجيبلك حقك لغاية عندك و يشفي قلبك .. إرميها عليه ..و إنساها ... إنساها علشان توقف نزيف روحك .. علشان ماتضاعفش الوجع ..علشان تعرف تعيش .. حاول تتحرر من قيود بتتغلل جوة قلبك و بتحجب روحك عن الطمأنينة ..حاول تنسى أو تتناسى علشان تعرف تكمل حياتك ..تستكين روحك ..إنسى علشان نفسك .. و إنت على يقين أن الديان لا ينسىإصبر و إحتسب و إنسى ..بس كدة.كلمة أخيرة محشورة ف زوري لكل حد ظلم حد ... الحق نفسك .. دعوة المظلوم لا ترد و إنت مش قد إنتقام ربنا .. الدنيا بتلف وتدور و كل حاجة بتترد .. حتى الكلمة بتترد .. الحق إستغفر ربك و رد المظالم .. راضيهم و خفف عنهم .. لو تقيلة عليك .. إنتقام ربنا أتقل .. و أسرع .. لإن لا المظلوم بيسامح و ما كان ربك نسيا .اللهم اني استغفرك من كل ذنب اعلم به و لا اعلم .
الخلاصة: - بلاش تهور - إتعلم تعتذر لما تغلط - كلمة أسف / ه مش هتقلل منك - إسمع منى ما تسمعش عني - إدعيلي أقدر أسامحك - إسألني قبل ما تزعلني #من_القلب_الى_القلب #كلمات_ليست_كالكلمات #مُسافر_عبر_الحروف #طه_حسين Taha Hussein
تسهيلاً على زوارنا الكرام يمكنك الرد من خلال تعليقات الفيسبوك
|
|