طه حسين تاريخ التسجيل : 27/05/2009
| موضوع: إحنا الفيسبوكيون القدماء الإثنين نوفمبر 21, 2016 2:24 pm | |
| إحنا الفيسبوكيون القدماءفى سبتمبر ۲۰۰۳ كانت نقطة تحول فى حياتي الإجتماعية ... يمكن سبقني فيها ناس بشوية ... بس مش شوية كتير و مش ناس كتير ... وعلى سبيل المثال ( Manal Alqurashy ) أول من أخبرتنى بوجود حاجه إسمها فيسبوك لإننا ببساطة ....الفيسبوكيون القدماء ..أينعم .. إحنا أوائل الناس اللى عملوا بروفايلات ... وأوائل الناس اللى كتبوا على الحائط .. من ايااااام ماكان البوست بيبقى (....Taha Hussein is ) ...لما كنا بنكتب أسامينا كنا بنكتبه ثلاثي أو رُباعي و لو كان فيه خانة لرقم البطاقة كنا كتبناها .. ماكانتش عائلة الحاج (الدلوعة و الأمورة و....) ظهرت لسة ببناته اللى مغرقين الدنيا ...الأسامي كانت لسة ببركتها يا عاطف !!! ... وردة الليل الحزين و شمس النهار و انا بحب جوزي و انا كلي ملكك و الصقر الجريح ..ماكانوش لسة ظهروا أو تقريبا (اتولدوا) ...و بما إنه فييييييس بوك ...ف كنا جميعا حريصين على وضع صورة (للفيس) بتاعنا .. وشنا يعني ...مش بطة براس قطة و لا اي عضو تاني زي الأشكال اللى بنشوفها !!! كل انشطتك كانت بتقتصر على شوية ابليكيشنز على جنب كدة من عينة..مواصفات برجك ...نسبة ذكائك ...سرعة غضبك ...تحليل شخصيتك ..عمرك العقلى الحقيقي ...و هكذاأذكر أول يوم عملت أكونت و بقيت شخصية فيسبوكية قد الدنيا ... وأخدت جواز مرور لعالمي الجديد...و إبتديت أدور على أصحابي ...كنت طاير من الفرحة و أنا بتفرج و بشوف صور ناس بقالي سنين ما شوفتهومش ...و مشاعر اختلطت ببعضها ما بين - فضول (إيه دة هى اتجوزت ؟ إتحجبت؟ خلف كام عيل ؟ ربى دقنه؟ ) ... - شماتة (تخنت اووووي ...هو ماله بقى أقرع و بكرش كدة ) ... - إعجاب ( دة عمل بيزنيس و فتح مكتب وااااااو!!! ...هي طول عمرها كانت شاطرة ..إيه دة هما كملوا مع بعض و إتجوزوا ؟؟؟ ) ... - الغيرة (يا بختها شكلها مبسوطة .. مالها إحلوت كدة ؟ ...دة سافر و عايش برة )... - الندم ( هو اتجوزها ؟ ياااااه هى عاشت حياتها و نسيته خلاص ؟).. - اشتياق ( وحشتووووني اوي ...يا ولاد اللذينا لسة دمكم خفيف ..ياللا نتقابل) ... و اسوأهم شعور الوحدة لما تكتشف إنك بقيت بعيييييد أوي... سواء مكانا علشان مسافر ..أو وقتا لإنك مطحون و بتدور ف ساقية...أو إحساسا لإنك إتغيرت كتير عن الأول!المهم ...إنه شوية شوية كنت بتلاقي نفسك فى عالم إفتراضي بس حقيقي أوي .... فعليا لوحدك بس برضه إنت مش لوحدك ...بتعبر و بتحكي ..بتشارك بصورك و بحالاتك المزاجية ..آرائك مشاعرك أفكارك ...كله بحرية ...على طبيعتك أوي ..بتكتشف كل إللى حواليك ..بتشوفهم هما كمان على حقيقتهم ...ورا الشاشة و الكيبورد حاجات كتير بنقولها مانتكسفش ...بنبعت رسايل مستخبية ..بنحكي..بنتكلم ...بنعبر ..بنشارك ..بس برضه كنا لسة حقيقين.الفيسبوك دلوقتي اختلف كتيييير عن الأول ... بقى الـ add friend لأسباب تانية غير إنهم يبقوا فريندز ... البلوك بقى أقسى و أسهل طريقة تعبر بيها عن غضبك و تطرده من حياتك الفيسبوكية ... الصور بقت مش حقيقية ... الشخص الواحد ليه أكتر من أكاونت لأكثر من هدف و حسب عدد الشخصيات إللى جواه ... و بدل ما كانت شبكة تواصل إجتماعي بقى شبكة تجسس اجتماعي ... و شبكة كراهية ... شبكة دعارة أحيانا كمان ! ...بدل ماكانوا الأقارب بيتواصلوا ...بقوا بيخسروا بعض ... وكإن الشاشة و الكيبورد إداك مطلق الحرية إنك تقول و تكون و تعمل اللى إنت عايزه بدون رقابة و بدون أى وازع من أخلاق او ضمير ... إداك الحق إنك تشتم و تتلفظ و تعبر عن رأيك بمنتهي الوقاحة و السفالة لمجرد إنك حر على صفحتك ...أو بتعبر عن رأيك !!!!...اللى لازم طبعا غصب عن نن عين اللي حواليك يكون صح! ...عادي تطلع إشاعة و يتم الترويج لأفكار غلط و تنتشر ...و مفيش ف الدنيا أسهل من زرار ال share ... و من شير لشير ...الحقايق بتضيع و ما تعرفش مين و لا فين الصح ...أصبح الفيسبوك سلاح خطير ...ممكن يجمع لثورة و ممكن يدمر سمعة ...ممكن يرجع تايه لأهله و ممكن ينقذ حياة مريض...ممكن يجمع قلوب و ممكن يكشف خيانات ...ممكن يولد حب و ممكن يخسر إخوات بعض ..ممكن يقرب مسافات و ممكن يهدم علاقات ..يوضح وجهات نظر و يقرب أفكار و ممكن يدلس و يغطي على حقائق ...إكتساب العداوات بقى اسهل كتير من إكتساب الصداقات ...و البلوك شغال زى الفل ...سرقة الأفكار ..فبركة الأخبار ...تعديل الصور ...و لاااااا أسهل!الفيسبوكيون الجدد ...ماعندهمش وقت يتحققوا من أي معلومة ...يقروا الموضوع لآخره ...يا عم حتى إفتح اللينك قبل ما تشير ...طب إقرا الكومنت اللى قبلك يمكن تغير رأيك!!!!! ...كل دة مش فى قاموسهم اصلا ...الفيسبوكيون الجداد اللى ماحدش حاطت صورته و لا إسمه و لا أي معلومة عنه ...جروبات و بيدجات ما أنزل الله بها من سلطان ... الفيسبوكيون الجداد شوهوا أجمل ما في الفيسبوك .. حولوا التواصل الإجتماعي لخراب إجتماعي ...قرف إجتماعي ...انهيار و انحطاط إجتماعيانا كفيسبوكاتي قديم بتحسر على الحال اللى وصلنا ليه ... بزعل على البنات اللى حولوا الفيس لسوق نخاسة و بيطبقوا كتاب كيف تصطادين عريسا و على كل لون يا باطيسطا .. او نسيوا إنهم بنات أصلا و الفاظ ايه ....عنب !... و لا الشباب بتوع (هاي ممكن نتعرف ) ... و طبعا الشتايم و الألفاظ جوز اللوز ...بالأب و الأم و كلهبقيت بخاف أفتح اي لينك او خبر ليكون فيروس او هاكر ... بقيت بتعامل مع الإينبوكس كإنه بابليك ( إحذر السكرين شوت) ... بقيت عارف ان كل حاجة متراقبة و متشافة و متسجلة و بتتجاب بسهولة No privacy at all ... خدعوك فقالوا privacy !!!!!!!مفاهيم كتير عندي إتغيرت .. الإينبوكس بقى بالنسبالى اوضة مقفولة ...مش اي حد يدخل و مش فى اى وقت ..شير الحالة المزاجية أو الصور أو مكاني بقيت أتردد كتير قبل ما أعمله ...إحذر انت مراقب بكاميرات عالية الحساسية و الجودة!!!! ...شير الأخبار والأحداث و حتى المقالات بقى مرعب ...لإن إنت فعلا مش عارف مصدر و لا صحة و لا هدف أى معلومة بتشيرها و ممكن تكون السبب في تأكيدها و نشرها ...التجول في الفيسبوك بقى كإني ماشي فى الشارع...بتفرج على كل الأشكال و الالوان ..بشتري و ابيع ..بلعب و أضحك .. بزعل و بعيط .. بس ما بصدقش حد و لا بثق في حد و لا عندي أي مشاعر حقيقية لحد ... كله اتغير ...كله مش حقيقي !!!!! ...بالرغم ان ال Face book دلوقتي بقى مليان أوبشنز .. بقى فيه التايم لاين ... بقى فيه games كتير و أبليكيشنز اكتر .. بقى synchronized مع برامج كتير ... بقى ليه إخوات صغيرين : whats app و الinstagram ... بقى عليه اكتر من 22 مليون مشترك من مصر بس !!!! ...لكن الحقيقة ...مابقاش زى الأول بالنسبالى ...فقد جزء كبير من مصداقيته و سحره ..لإني ببساطة إكتشفت إنه Fake bookالخلاصة: - انا حطاك ف دماغي....و براقبك - الجيل دة اتظلم يا حسين - فيسبوكاتي قديم وأفتخر - إحنا الفيسبوكيون القدماء - حضاااااااارة عرااااااااقة كومنتاااااااات#من_القلب_الى_القلب #كلمات_ليست_كالكلمات #مسافر_عبر_الحروف #طه_حسينTaha Hussein
تسهيلاً على زوارنا الكرام يمكنك الرد من خلال تعليقات الفيسبوك
|
|