طه حسين تاريخ التسجيل : 27/05/2009
| موضوع: إعمل عبيط الأربعاء نوفمبر 23, 2016 12:01 pm | |
| إعمل عبيط مره من المرات حضرت عيد ميلاد إبن صديق ليا كانوا جايبين ساحر لطيف أوي.. طلب مني اشاركه في فقرة من الفقرات.. و لزوم الساسبينس كان المطلوب أاكد إن مفيش خدعة و إن كله تمام ... هبرا كدابرا .. و هوب بخفة إيد طلع الحمامة من الكوباية .. خلصت الفقرة و أنا مبسوط بجد و بضحك من قلبي .. وسط تصفيق و تشجيع و انبهار الأولاد ؟؟انا عارف انها لعب و مش حقيقية بس عملت نفسي مصدق .. و هو عارف إنه بيضحك علينا و إننا فاهمين إنها لا سحر ولا بتنجان بس كمل وفرح من التشجيع .. الولاد عارفين إن فيه خدعة ما و إنه برضه لا سحر ولا اي حاجة بس ضحكوا وإنبهروا وفرحوا جدا...اصل هي الحكاية كدة !! ... المتعة عايزة شوية تغافل .. ماتكرزوش أوي ف التفاصيل و أصل الحكاية والرواية ... أجمل أكلة بنستمتع بيها هي اللي مش بنبقى طبخينها .. وأحلى فيلم بنستمتع بيه قبل ما نشوف الميكينج و الكواليس .. أجمل فرحة بنستمتع بيها اللي بتيجي على غفلة .. وأجمل الأحداث و المواقف اللي بتبقى مفاجئة !.. التحضير الكتير و التفكير و التركيز ..أحيانا كتير بيفقدنا جزء كبير أوي من البهجة ..إعمل نفسك عبيط عن الحاجات التافهة اللي بتمر في حياتك .. غمض عينك عن التفاصيل اللي بتوجع بس .. لا بتقدم ولا بتأخر ولا هتفيد ولا هتضر .. ماتركزش في كل نقطة في كل لفتة وكلمة وتفصيلة ..تغافل .. إعمل عبيط مع الدنيا .. سيب اللي عايز يمثل ويعيش الدور .. يعمل اللي هو عايزه .. سيب اللي فرحان بكام كلمة من ورا ضهرك .. يقول ... سيب اللي عامل نفسه حبيبك وهو بيكرهك .. ياكل في نفسه .. طالما مش آذيك .. سيبهم و كبر مخك أوي ..عيش الحياة على الحياد .. ماتدخلش ف تفاصيلها أوووي .. ما تكشفش خباياها .. ماتهتكش المستور.. ما تجريش ورا اصل الحكاية و لا نواياهم الخفية .. إفرح باللحظة الحلوة وإمسك فيها .. وإنسى اللحظة الوحشة و سيبها تعدي .. سقفلها و قولها برافو .. ماتمسكش فيها و تسمحلها تأثر فيك .. إضحك عليها قبل ما تضحك عليك .. لاعبها ماتخليهاش تلعب بيك .. الخلاصة: - هي الفرحة كدة .. علشان تعيشها بجد .. لازم احيانا تعمل عبيط - فقرة الساحر - شوية تغافل - سيبهم يلعبوا - بمزاجك - ماتركزش في كل حاجة - إضحك علي الدنيا - إعمل عبيط#من_القلب_الى_القلب #كلمات_ليست_كالكلمات #مسافر_عبر_الحروف #طه_حسينTaha Hussein
تسهيلاً على زوارنا الكرام يمكنك الرد من خلال تعليقات الفيسبوك
|
|