نظرية الباز أفندي
من اجمل لقطات كلاسيكيات السينما ... الريس حنفي و هو بيقنع بنته عزيزة بالجواز من الباز أفندي ... المتعلم الأبهة ساقط التوجيهية و سمسار مراكب و قباني و العكس ...وهو بيقولها بمنتهى الإقتناع (طب دة عليه كرافتة ترد الروح ... الباز أفندي !!؟؟؟ دة راجل انا ذات نفسي اتمناه )و بعيد عن الحبكة الكوميدية اللي خلت الباز أفندي (توفيق الدقن ) في مواجهة حسن (أحمد رمزي ) لكسب ود عزيزة (هند رستم ) بالضغط مرة و بالإغراء مرات ... لكن فعلا خلينا نطبق الكلام دة على ارض الواقع ...كتير بنلاقي ناس واقعين في هيام و غرام ناس تانية و بيتكلموا عليهم بمنتهى الإقتناع و الغزل و إنت بالنسبالك مايتقلعوش من الرجل ... أو تلاقي حد كاره حد جدا و مش طايقه و إنت تبقى شايف جناحاته بترفرف و الجليتر طاير حواليه ...
و نبقى مستغربين
مين جاب دة لـ دة ؟...
وإزاي دة حب دة، ..
وإزاي دة ساب دة ؟...
وإزاي دول اتفرقوا، ..
وإزاي دكوهما اتجمعوا ؟...
إزاي أجدع !!!؟؟؟ (بصوت عادل امام)ببساطة لطفي بوشناق قالها زمان (خدوا عيني شوفوا بيهاااا) ..
المقاييس بتختلف من شخص لشخص ...
اللي انت شايفه الباز أفندي بكل مقاييسه الفتاكة و مقوماته الرهيبة ..أنا مش شايفه كدة .. أنا مش محتاج كل دة ... عنده كل حاجة صحيح .. بس و لا حاجة فيهم تهمني .. وما عندوش الحاجة اللي انا محتاجها و عايزاها و شايفها أهم حاجة في الدنيا ...يبقى متقدملها شباب من بتوع إعلان الحزب الوطني بتاع زمان دة ... قيمة و مركز و وظيفة ميري و حاجة تشرح القلب الحزين ... وهي على كلمة واحدة (ماخدوش يا بابا ماخدوش يا بابا ) و يبقى يا ولداه أبوها هيتجنن .. ماله الجدع طب دة عليه كرافتة ترد الروح ...تبقى متجوزة واحد مركزه مرموق و مثقف جدا و وسيم و رياضي ... بس مش سعيدة و تبقى عايزة تطلق .. و لو انفصلت و إتجوزت تاني ..تلاقيها سعيدة جدا مع واحد اقل كتير منه امكانيات و مركز و شكل ...!!!!ماتستغربش ...
هي يمكن لقت فيه حنان وحب وإحتواء ..
يمكن عرف يوصل لقبها و عقلها ...
يمكن خلاها تضحك بجد بكل روحها ...
يمكن طلع الطفلة اللي جواها ...
يمكن حاجات كتير إحنا مش شايفنها و لا عمرنا هنشوفها لإنها ما بتتشافش اصلا .. بتتحس بس .هو يبقى حواليه أشكال و الوان من البنات ... و لا واحدة فيهم تلفت نظره و لا تعجبه و لا تشغل حيز من تفكيره ... يبقى متجوز ملكة جمال المجرة .. هيفاء ..شقراء .. دعجاء ... سمراء ..فيحاء ..مواصفات أوروبية فول اوبشن .. و تلاقيه برضه مش مبسوط ... و يروح يدور على واحدة اقل كتييييييير جدا .. و نبقى مستغربين ساب دي علشان دي ؟؟؟ هاو كام ؟ايوة ... ساب دي علشان التانية عرفت تسعده ... عرفت ترضيه ... عرفت تحسسه برجولته .. عرفت تكمل الحتة الناقصة اللي فيه ... عرفت تروض غروره ... عرفت تملى عينه ... حاجة كدة برضه مالهاش مقياس و لا قاعدة ...
مش كل حاجة تعجب غيري تعجبني ... و لا إكمنها كاملة من مجاميعه من وجهة نظرك ..تبقى كاملة بالنسبالي ...
ما يمكن انا ليا مجاميع تانية خالص .. كل واحد أدرى بمجاميعه بقى
الخلاصة ... العلاقة بين أي اتنين عاملة زي قطعتين البازل ... مش كل القطع تمشي مع بعض ..
ومش معنى ان شكل القطعتين حلوين يبقى لازم يركبوا مع بعض ...
وما ينفعش برضه نركبهم بالعافية و نقعد نحشر فيهم ..بتبقى علاقة مش مرتاحة.. ومع الوقت يا الحياة هتبقى مخنوقة ولا تطاق .. يا حد فيهم هيتكسر ... ونرجع تاني ندور على القطعة اللي ماشية معايا و تتركب مظبوط و تبقى مريحاني ...
طب ما من الأول !!!!! طاه.نصيحة ...
ما تاخديش الباز أفندي علشان كل صحابك هيتجننوا عليه و لا أهلك يستمنوه ...
ماتاخدش الست ترتر علشان فول أوبشن و كل صحابك هيحسدوك عليها ...خدوا اللي يليق عليكم و ترتاحوا معاه ... خدوا اللي شبهكم ... خدوا اللي يدخل قلوبكم و يرضي عقولكم لواحده كدة من غير اي وسائل مساعدة ...
الخلاصة:
- الباز أفندي كرافتته ترد الروح صحيح بس مش شرط روحك إنت
- لا هتسعديه ولا هتعيشي مبسوطة ...وهتطلعي روحه وهيطلع روحك
- حنفي !! مفيش حنفي
- قال الباز أفندي قال
- ساقط توجيهية سمسار مراكب قباني و العكس
- دور على قطعة البازل
- دور على اللي يكملك
- مالهاش مقياس
- ماتستغربش ماتستعحبش
- ماتحاولش تفهم
#من_القلب_الى_القلب
#كلمات_ليست_كالكلمات
#مُسافر_عبر_الحروف
#طه_حسين
Taha Hussein