طه حسين تاريخ التسجيل : 27/05/2009
| موضوع: نسل آدم (تراب وطين) الجمعة نوفمبر 25, 2016 11:35 am | |
| نسل آدم و لأن آدم خُلق من (أديم) الأرض .. يعني التراب او الطين ..ف طلع نسله من كل اشكال الأرض !!فيه ناس زي الأرض الخصبة دايما مثمرة .. متجددة و معطاءة .. على قد ما بتديها .. بتديك .. خير و ضل و بهجة الناس دي بتكون واضحة كدة من صغرها .. بيشعوا طاقة لكل اللي حواليهم وبيملوا مكانهم و يفرضوا وجودهم .. تحسهم نجوم في ليالي ضلمة .. تهدي فى توهة .. و تحلي الأيام .. بتبرق كدة منين ما تروح .. لو لقيتهم أو إتكعبلت فيهم .. إوعي تسيبهم أو تضيعهم ..دول تمسك فيهم بإيديك و سنانك ..اللي زي دول ما بيتعوضوش .و فيه ناس بور مهما إديتها تاخد بس .. و مهما تعبت معاها .. بتفضل قاسية و ناشفة .. مهما سقيتها ..تشرب و ما تديش .. و يوم تجود عليك .. تطلع فرع ضعيف لا يضلل و لا يأكل و أقل نسمة هوا تكسره .. دول خسارة فيهم تبذل معاهم أي مجهود ..خسارة تهدر وقتك و حياتك معاهم .. تجنبهم على قد ما تقدر .. ولو تقدر إهرب . إهرب من أي علاقة قايمة على الإستغلال ..أي علاقة تاخد بس ..أي علاقة سكتها إتجاه واحد ..لأنها مش هتخلص إلا لما تخلص عليك .و فيه ناس زي الصحرا تظنها جافة و ميتة .. مع إنها مليانة حياة ... مهما إرتوت بمطرة تخدعك بمظهرها القاسي .. و تكتشف إن كله متخزن و مارحش هدر .. أبيار عميقة .. حتى لو هي نفسها ما تعرفش.. أو ماتبينش ...بتستنى اللحظة اللي تكشف فيها كنوزها .. اللحظة اللي بتخبطها رجلين سيدنا إسماعيل .. بتفجر عيون .. فجأة تلاقيها واحة .. فجأة الحياة تدب و تظهر و تبان .. تلاقي جمال عمرك ما شوفته .. و دفا عمرك ما حسيته .. و هدوء و سكينة عمرك ما قابلتها.. كإنها بتقولك شكراً .. شكراً على صبرك و على إيمانك بيا .. شكراً على ظنك و احساسك .. شكراً انك بصيت أبعد من حبات الرمل.. أعمق من سطح جاف ... من فضا يخوف .. بتقولك شكراً إنك آمنت اني مش ميت ..إن جوايا في مكان ما ..لسة حياة قادرة تنبض و تعافر .. شكراً إنك ما كنتش في حياتها مجرد عابر سبيل .. شكراً إنك كنت ليها رجلين إسماعيل ..فجرت طاقة حبها .. و فيضت أنهار خيرها ..دبيت فيها الحياة تاني ..و زي ما الطيور على اشكالها تقع .. النبتة بتحن لأرضها و تربتها .. لو إتزرعت في غير مكانها تجف و تموت .. و لو إتوجدت في مكانها الصح تزهزه و تورد ...دور على الأرض اللي شبهك .. ماتعافرش في البور .. دور على اللي يضلل و اللي يديك قد ما ياخد .. اللي معاه تقدر تشق جذورك و تمد فروع .. دور على الخير ف قلوب البشر ... بص لأبعد من مجرد سطح .. إفتح ببان و نفض تراب ..العلاقات محتاجة تعب و مجهود ..مثابرة و إيمان .. ثقة إن فيه حاجة حلوة ..حتى لو مستخبية و مش باينة .. مستنية بس اللي يستاهلها .. اللي تعب علشان يوصلها . اللي يستاهل يتمتع بجنتها .. جنة آدمالخلاصه: - إتعب مع اللي يستاهل - ماتعافرش في البور - إمسك في الطيب - على قد التعب هتلاقي - العلاقات محتاجة مجهود - البذرة بتحن لأرضها - الإهتمام والثقة تحول الصحرا لجنة#من_القلب_الى_القلب #كلمات_ليست_كالكلمات #مسافر_عبر_الحروف #طه_حسينTaha Hussein
تسهيلاً على زوارنا الكرام يمكنك الرد من خلال تعليقات الفيسبوك
|
|