طه حسين تاريخ التسجيل : 27/05/2009
| موضوع: المضمون في تربية القرون الأربعاء ديسمبر 07, 2016 10:57 am | |
| المضمون في تربية القرون كيف تربيين (محجوب عبد الدايم ) ؟؟ شوفي يا ستي .. تربية القرون مافيش أسهل منها ابدا.. بس إنتي لازم تبتديها من بدري علشان تحصلي على نتيجة تنافس بلاد برة .. شغل خواجات على أصوله.. حاجة اوستيك كدة ..1- من و هو صغير قبل ما يطلعله شنب ... و يبتدي يبان على مبادئ الرجولة الفطرية دي .. إكبتيه .. ماتخليهوش يقول رأيه في حاجة .. حقريه .. و إتريقي عليه على الهايفة و المليانة..قللي منه قدام الناس و حسسيه إنه ولا حاجة .. و قوليله *الجملة السحرية* .. و دي تتحفظ عن ظهر قلب (لما يبقى يطلعلك شنب إبقى إتكلم ) و ممكن تجودي عليها بإضافة وصف للشخصية بمعايرة (يا بو ريالة و إخواتها) 2 - لو ليه إخوات بنات ف دي فرصتك الذهبية يا حلوة... أول ما تكبر وتدور وتبقى مزمزيل حلوة كدة.. هوب .. لبسيها مكشوف و خليه يمشي معاها في الشارع .. لا .. و يتصور معاها وبؤه من الودن للودن.. ولو اعترض ولا أبدى إستياءه بأي شكل .. ونبتدي شغل الحجج الفارغة بأة بتاعة " بتتعاكس .. الولاد بيتفرجوا عليها .. عيب كدة .. مايصحش كدة ".. زي ما إتفقنا .. تظرفيه الجملة السحرية بتاعتنا (لما يبقى يطلعلك شنب إبقى إتكلم ) أو (هوأنت فاكر نفسك راجل !!؟؟؟) و دي تتقال و بعدها صوت مصمصة شفايف... بتبقى هايلة 3 - لو أخته الحلوة كمان ليها أصحاب ولاد .. جيران .. صحاب النادي .. نظام (هاي شلة هاي جروب) .. حسه عينه ينتقد أسلوبها في التعامل الخارج معاهم ( إن وجد ) ..البنت تهزر بإيديها براحتها .. وزي ما كلنا عارفين "طالما البوسة اين بابليك من غير فيلينج ..يبقى سوووو وات" .. يشتموا بعض هزار .. يلعبوا صلح .. يسهروا للصبح ... كل دة مش مبرر أبدا إنه يعترض .. دة انتي تجبريه يسهر معاهم و يصورهم كمان و يعمل بوز بطة .. وإذا زمزأ ولا برطم .. زي ما إتفقنا عليكي و على الجملة السحرية- لغاية المرحلة دي الله أكبر كدة لو حسستي على راسه هتلاقى حتتين بارزين ناشفين شوية .. ماتقلقيش أبداً .. دي بداية القرون 4 - لما يطلعله الشنب بأة هيكون إسم الله عليه كبر وإحلو ولازم إحنا كمان نجدد ونغير إستراتيجيتنا ...اوام تدخلي عليه بجملة ( لما تتجوز إبقى أحكم في بيتك )5 - لما أخته تقولك نازلة أسهر مع اصحابي ..pool party.. تلبس عريان وترجع وش الفجر ريحتها سجاير ..او يشوفها في أي وضع مش لذيذ مع البويفريند بتاعها .. إوعي حسك عينك تسمحيله يوجهها أو يزعلها .. أو يعمل نفسه شافها .. يدور وشه من سكات و يمشي علشان ما يكسفهاش .. ولو فكر ينطق ويفتن على أخته مثلا و يقولك يا ماما بتعمل و بتعمل ... قوليله :- أولاً الفتنة حرام .. ثانيا أنا أمها وحرة .. ثالثا جملة ( لما تتجوز إبقى .. الخ)... و لو جدعة بأة خلي أخته اللي تقوله كدة بنفسها وتعلي صوتها وتهزقه .. وكدة يبقى ضربنا عصفورين بحجر .. طلعتيها الله اكبر بجحة وطلعتيه سيد أمه اسم الله عليه بقرون طوال كدة يسدوا عين الشمس.6 - طبعا زي ما إتفقنا لبس بنتك حرية شخصية للمجتمع .. نحب نبسط الناس كدة و ننعنشهم.. على نفس السياق تصرفاتها المتحررة الخارجة عن الآداب العامة ..هي حرية شخصية لأصحابها برضه .. براحت راحة راحتها و اللي مش عجبه يخبط راسه في الحيط .. ولو فكر بس .. فكر يعترض .. زي ما اتفقنا عليكي و على الجملة السحرية .7- طبعا مش عايز أفكرك ..حسك عينك تنتقدي أي واحدة ماشية في الشارع أو أي وضع مخل في السينما مثلا.. أبسط حاجة هيقولك بصي لنفسك... إوعي طبعا تراقبي موبايلاته أو تعملي أي رقابة عليه ..مواقع و افلام و كدة .. الواد حر.. إذا أخته وأمه كدة .. عايزاه هو إزاي ؟؟؟ وبعدين كدة ممكن تأثري على نمو القرون وتضيعي مجهود السنين اللي فاتوا ... الواد يتنكس كدة يا ستي أقدر أبشرك وأقولك الف الف الف مبروك.. بقى عندك (محجوب عبد الدايم) قد الدنيا .. لو إتجوز رقاصة ولا يهمه .. عسل كدة .. شايف الدنيا وردي وردي و الحياة بييييييس... جيل زي الفل .. لا زوجات هتحترم أزواجها و تسمع كلامهم .. ولا أزواج هيغيروا على زوجاتهم ويراعوا أهل بيتهم ويحافظوا عليهم .. و حركات الناس المتخلفين دول...شباب ورجالة زي الورد قادرين إنهم يشوفوا العيبة في أهل بيتهم ولا يتهزلهم شعرة .. بلا نخوة بأة ولا رجولة ولا الكلام الفارغ دة كله .. وربنا يقدرنا على صنع جيل من الخواجات قد الدنيا ينافس المنتج العالمي ...و هو نبقى بالمرة حلينا عقدة الخواجة عَن النَّبِيّ صَلَّى اللَّهُ عَلَيه وَسَلَّم قَالَ: ثَلاثَةٌ لا يَنْظرُ اللَّهُ إِلَيْهِمْ يَوْمَ الْقِيَامَةِ: الْعَاقُّ وَالدَّيُّوثُ وَالْمَرْأَةُ الْمُتَرَجِّلَةُ تَشَبَّهُ بِالرِّجَالِ** كلمتين جد بقى ** البيت هو أساس المجتمع .. من شب على شيء شاب عليه .. لو من الأول إتعلمت إن جسمها غالي عليها .. تصون روحها .. وتحترم نفسها .. إن التحرر والتقدم مالوش أي علاقة باللبس المكشوف ولا الألفاظ الخارجة ..مش هنشوف المناظر اللي بنشوفها حوالينا وبننتقدها .. بدافع إنك مش عايزاها معقدة و خليها تعيش سنها !!! وإن أنا بنتي لا يمكن تشرب ولا تصاحب ولا تتجوز عرفي !!!!إبقي قابليني يا قطة ..فين !!؟؟؟ هناك عند ال pool party لو إتعلم إن الغيرة على العرض رجولة .. وإنعدامها مش open minded وشياكة .. لو إتعلم إن البنت عقل ومشاعر قبل جسم ومؤهلات .. إن احترام الست ومراعاتها ورعايتها واجب مش فضل ..مش هنشوف معاكسات .. ولا الرجالة اللي بتشوف بعنيهم التحرشات ويدوروا وشهم .. ولا هنشتكي من زوج سلبي إتكالي زي قلته ف البيت .. ولا راجل بيمد إيده على أي ست مهما كانت وغيرها من الظواهر الجديدة اللي بنشتكي فيها من إنعدام النخوة و إنحصار معنى الرجولة في لقب على شهادة الميلاد في خانة الجنس . إبتدوا من بيوتكم .. علشان ترحموا الأجيال اللي جاية زيجات فاشلة و بيوت خربانة و جيل من سيء لأسواء .الخلاصة: - دليلك سيدتي - فن تربية القرون - ياختي جماله حلو ياختي قرونه حلو .. - اتقوا الله في ولادكم - جيل ما يعلم بيه الا ربنا #من_القلب_الى_القلب #كلمات_ليست_كالكلمات #مُسافر_عبر_الحروف #طه_حسين
تسهيلاً على زوارنا الكرام يمكنك الرد من خلال تعليقات الفيسبوك
|
|