مضاد للزمن سؤال محير جدا بالنسبالي و بسرح فيه كتير .. إزاي بنشوف حد و نديله سن معين ! .. يعني إزاي بنعرف .. أو بمعنى أدق (بنحس) إن الشخص دة عشريناتي .. أو ما يقلش عن أربعين .. أو دة معدي الخمسين مستريح أو ستين أو سبعين!!!؟؟إزاي من مظهره بس نقدر نحس بعمره !؟ ..
مع انهم بيبقوا عاملين اللاللي .. إيشي ميكاب ..إيشي فيلر و بوتوكس على شوية فوتوشوب للصور و فلاتر ..و لابسين و متشقلبين و واقفين على دماغهم كمانصحيح ساعات كتير المظاهر بتخدع في الوهلة الأولى ..
بس مابناخدش وقت كبير و بنقدر نخمن و نحس بالعمر الحقيقي .. أو أقرب حاجة ليهإزاي العمر بيتحس !.. و إزاي اكتر ممكن حد ياخد اكتر من عمره و إزاي أقل !!!؟؟؟كتير بسرح في وشوش الناس و أحاول أطلع الفروق .. أو أستنتج الأعمار .. و بحاول مع نفسي أفسر منين الإحساس دة ... إكتشفت ان الموضوع مالوش علاقة بتجاعيد أو لبس أو شيب في الشعر.. لا ..لإن معظمهم يا معدل يا مخبي يا مظبط- فيه حاجة ف العين بتفضح ..
- فيه لمعة مع الوقت بتطفي ..
- نظرة بتتكسر ..
- ضهر بينحني
- وخطوة بتتقل ..
- فيه نبرة في الصوت بيبقى ليها صدى مختلف ..
- الهم و الفكر و الخبرة بيبانوا على ملامح الوش مهما حاولوا يداروها ..
- فيه إقبال على الحياة و شغف بيفتر أو يفقد إنطلاقه و عنفوانه ..
- فيه رغبة و إصرار بيفقد قوته و تحديه ..
- فيه نظرة بتحسها بحر ..
- كلمات بتحمل اكتر من معنى و بتضرب جواك ف مليون حتة ...
- بيشوفوا للحكاية أبعاد تانية ..
- ودايما ليها ابعاد تانية و كواليس و محفزات و مقاصد غير اللي ظاهرة ..
- دايما ورا الحكاية مليون حكاية ..
العمر بيبان أوي على الروح .. علشان كدة بيتحس العمر ليه بصمة .. أو ختم ..بيختم بيه على قلوبنا زي باسبور السفر .. رايح .. جاي ..و كل ما كتر الترحال و الأحداث .. كترت البصمات ... زادته قيمة و ثقل .. و عمر ..فوق العمر !قد ايه هتعيش ..مالناش فيه يد .. مكتوب عند ربنا من قبل ما نتولدبس إزاي هتعيش .. دة احنا اللي بنكتبه و بنقرره و بنسيبه ينحت و يأثر فينا و يزود أو ينقص في أعمارنا .. بيتقل أو يخفف خطوتنا .. يطفي أو يشع ف نظرتنا .. إحنا اللي بنديله الفرصة أو نقوله كفاية و نجري بعيد بعيد .. يا بنقتحم و نواجه .. يا بنخاف و نستخبى .. و نعيش العمر خايفين .. من سنين بتعدي و بتجري و مش عارفين نمسكها .. و من هموم بتحط على قلوبنا جبال و مش عارفين نزيلها .. و لا نقوم حتى من مكاننا ننفض ترابها ...عمرك بإيدك .. ماتسيبش الدنيا تنحت قسوتها على قلبك .. خلي قلبك صغير .. روحك ترفرف .. طير بخطوتك تدب الأرض تفجر عيون .. نقص من عمرك وإرمي .. عيش اللي مكتوبلك تعيشه وإنت حاسس بكل دقيقة و فخور بيها و فرحان ..الخلاصة:
- عيش عمرك
- الفرحة مضادة للزمن
- أحسن من اي فلاتر و كريمات
- ماتسيبش التجاعيد توصل لقلبك
- إرمي الهموم و إجري
#من_القلب_الى_القلب #كلمات_ليست_كالكلمات #مُسافر_عبر_الحروف #طه_حسين Taha Hussein