الحته الحلوهفيه ناس كدة تحس انهم اتخلقوا ف الدنيا علشان نعرف نعيشها ... علشان يدونا سبب إننا نكمل ... إننا نحس بقيمة الدنيا و حلاوتها ..
تحس كدة انهم ضلة في يوم شمس ... نسمة باردة ف يوم حر ..
بوء ماية متلج يبل ريقك بعد صيام ...
تحسهم كدة دش بارد بشاور جيل بريحة الخوخ بعد يوم مترب و ملزق ..
حضن بعد توهة ... راحة بعد تعب ...روقان بعد زحمة ..
فنجان قهوة ساعة عصاري ..
تحس يومك بيتحول 180 درجة و فجأة تحب الدنيا و تحس ان فيها حاجة حلوة تستاهل تتعاش
...
* عارف انت الشخص اللي أول ما تشوف وشه تلاقيه بيقابلك بإبتسامة و عينه مليانة حب ... لا يعاتبك و لا يقولك ما بتسألش و لا يحسسك بذنب الغياب و لا كإنه كان بايت معاك
..
* عارف الشخص الحسيس اللي عارف إنك محتاج تفضفض من غير ولا كلمة ف يسيبك على راحتك تقول أو ما تقولش بس المهم إنك تخرج من المود .* عارف اللي يبقى حاسس بيك من نبرة صوتك و قبل ما تطلبه تلاقيه واقفلك تحت البيت أو بيخبط ع الباب و ياخدك بالحضن كدة علشان بس يحسسك إنك مش لوحدك
.
* عارف الشخص اللي تحس إن كلامك معاه إترمى ف بير مالوش قرار ... كإنك ماقولتوش و تحس هم و إنزاح من على قلبك و عمر ما نظرته بتتغير ناحيتك لإنه عارف أصلك و فصلك... و عارف ان كلنا بنغلط و بيلتمس لك مليون عذر .* بلاش ... طب عارف الشخص اللي بيفرح اوووووي بهديتك و يفتحها بشغف كدة و يحسسك إنك جبتله الدنيا و انت أصلا جايبله باكو لبان ترايدنت ب جنيه و نص ...و كل ما تيجي مناسبة كدة يفرحك و يقولك إنه قد إيه مبسوط و فرحان بكل حاجة معاك
.
* عارف إنت الشخص اللي لما بتغلط فيه لأي سبب يسامحك كدة و ينسى بمجرد تلميحة .. مش مضطر تشرح و لا تعتذر و لا تلاقي مبررات ... هو مسامحك و خلاص
.
* عارف إنت الشخص اللي مهما بعدتكم الدنيا و شغلتكم الحياة بمجرد ما تتقابلوا و لا كإن حاجة حصلت و تستمتعوا بحكاياتكم و تفضلوا تضحكوا و تسمعوا بعض بكل تركيز وإنصات و بعدين تروحوا تنشغلوا تاني عادي جدا لغاية ما تبقوا تتقابلوا مش عارفين امتى .* عارف الشخص الجميل اللي مايحملكش فوق طاقتك بطلبات أو مشاعر أو أي حاجة ..تحسه خفيف كدة ف ظهوره و إختفاؤه و عتابه و عشرته ... تحسه سهل و جميل ... و لما يعملك حاجة حلوة ما تحسش إنك مديون و لا شايل هم تردهاله إزاي.* عارف إنت الناس الحلوة اللي بتحسسك إنك حلو و الدنيا حلوة و مش مستاهلة زعل و لا نكد ..و مهما ضاقت هتفرج ..و مهما باظت هتتحل ..
اللي يطمنك كدة و يقولك ماتشيلش الهم ...
اللي يهونها عليك و يبسطلك الصعب و يوريك الحتة الماليانة م الكوباية ...
اللي يفكر معاك و خايف عليك و لما ينصحك يبقى من قلبه ...
الناس الجدعة اللي تلاقيهم ف ضهرك و عارف انك ليك رصيد عندهم و عشم ...
اللي مش مضطر تلبس ماسك او تخبي عيب او تظهر بحاجة مش فيك او تضغط على نفسك بأي حاجة علشان تنول الرضا او تتقي شر كلامهم او ملامهم او نظراتهم ...
عارف انت الناس الحلوة دي ... بجد ربنا يخليكم لينا ...ربنا يحميكم لكل حبايبكم و تفضلوا كدة الحتة الحلوة اللي فى الدنيا ...الخلاصة:
- حباية الفيتامين اللي بتقوينا على بلاوي الدنيا ..
- زي الجبل اللي بيحفظ استقرار الأرض ...
- إنتوا بتحافظوا على استقرار حياتنا و انتم مش حاسين ..
- ربنا يحفظكم و يكتر منكم
- الناس الحلوة
- الحلوين بس
- الوحشين لأ
#من_القلب_الى_القلب
#كلمات_ليست_كالكلمات
#مُسافر_عبر_الحروف
#طه_حسين
Taha Hussein