طه حسين تاريخ التسجيل : 27/05/2009
| موضوع: لسانك بينقط عسل الخميس يناير 19, 2017 5:03 pm | |
| لسانك بينقط عسلما يحرقش دمي قد اللي يبتدي كلامه ب (معلش ماتزعلش مني في اللي هقوله دة .. بس انت *^/$€£:""'*&) .. اة اوكيه ثواني كدة ادوس على زرار الزعل وأشغل خاصية ماتزعلش مني ... نعم !!! و بعدين يقوم رامي كلام زي الدبش و يختم بأكلاشيه ( اصل انا صريح و احب أقول للأعمى إنت أعمى ف عينه .. اة والله) .لا حبيبي ..دي مش صراحة ..دي وقاحة مفيش حاجة اسمها ماتزعلش مني و تقوم رازعني ف خلقتي!!! ... ما زعلش منك ليه و بأمارة ايه !!؟؟و بعدين صراحة ايه اللي تسمحلك تخبط في الناس و توجعهم و تقولهم كلام يسم بدنهم!!! ... بناقص صراحة حضرتك بصراحة .من يومين واحد حبيبي أوي بيكلمني و منهار في ..حالة من الضيق و الإكتئاب الشديد... لإن واحد حبيبه أوي برضه قاله رأيه في مشكلته ..بس بطريقة اللي يقول للأعمى يا أعمى.. بدافع الخوف عليه من وجهة نظره طبعا ...كان حرفيا هيروح فيها من كتر الضغط و الألم النفسي اللي حسه .. بعد ما هديته و رجعت قولتله نفس المعنى بس بمفردات تانية ..بهدوء و براحة .. و انا بحاول اختار الكلام المناسب وأوصل للمطلوب برضه .. براعي إن اللي قدامي إنسان مش حيطة.. فهم و استوعب و هدي .. ووصلت لنفس النتيجة ..بس من غير وجع و لا كسرة نفس ... و كإن الدنيا نورت تاني و الهوا ملا صدره .. و الدنيا فجأة بقت حلوة تاني ..و فضل يشكرني كإني جبت التايهة ..مع ان كل اللي عملته إني نقيت الكلام وإخترت أحسنه .سؤال بأة لبتوع الصراحة الوقحة ..هو الأعمى مستني حضرتك تواجهه بعماه ؟؟ إتفاجئ مثلا ؟؟ ما كانش واخد باله ؟؟ كل واحد عارف كويس أوي مشاكله فين ..بس لما بنلجأ لبعض أحيانا ..بنبقى علشان محتاجين حد يطبطب و يريح .. حتى لو محتاجين نصيحة أو حد يواجهنا بالحقيقة المرة .. بنبقى عايزينها برفق و لين ...كل واحد فيه اللي مكفيه ..كل واحد عنده حاجة خايف منها وحاجات خايف عليها .. كل واحد جواه جرح متداري و حتة مخبيها عن عيون كل الناس ... خوفك عليا و صدقك معايا مش مبرر أبدا لجرحي بكلامك ..لسة فيه ناس للأسف مش متخيلة حجم تأثير الكلمة و قوتها في تغيير مواقف و نفسيات و ممكن خطط حياة بالكامل بتتشكل بكلمة .. سحر الكلمة اللي ممكن تنقلك من حالة لحالة و من نفسية لنفسية تانية خالص .. دة بكلمة ناس بتتجوز و ناس بتطلق .. بكلمة ناس بتموت و ناس بيتكتبلها الحياة ... بكلمة دموع بتنزل و بيتجرح قلب.. وبكلمة دنيا بتنور و ضحكة بتجلجل .. بكلمة حرب بتقوم و سلام بيدوم .. بكلمة ربنا خلق آدم و ذريته و خلق الكون بكن ..فيكون ..انتوا ازاااااي بجد مستهونين بالكلمة ... بتطلعها من بؤك و ترميها .. من غير تفكير ..و تضرب زي ما تضرب .. توعد دة .. و تخدع دة .. و تكدب على دة .. و تضحك على دة ..بكلمة ..و تقول ايه يعني كلمة !؟ ..دي كلمة لا هتودي و لا هتجيب .. دة حتى كلام الليل دايما مدهون بإيه ؟؟ بزبدةيا ريت نفكر كويس أوي قبل ما ننطق أي كلمة .. نصيحتك على عيني و راسي ..بس لو هترميها زي الطوب ..فأنا ف غنى عنها .. لو فاكر وإنت بترميها إنك بتداوي حاجة ..فهي فعلا قصادها بتجرح الف حاجة .. يا ريت نفكر قبل ما نوعد حد بحاجة و نخليه يعتمد علينا .. من باب دي كلمة (فض مجالس) ...يا ريت نراجع نفسنا الف مرة قبل ما نكدب على حد بحاجة و هو يكون مصدقك و بيآمنلك .. لإن قصاد كل كدبة .. و قصاد كل وعد ما وفتش بيه .. جسور ثقة بتنهار وأحلام بتموت وأيام بتدبل و نفس بتتكسر.. و ناس بتحبكم أوي مع الوقت بتخسروها .بفتكر دايما مقولة بحبها أوي لسيدنا عمر بن الخطاب رضى الله عنه : «لولا ثلاث ما أحببت البقاء في الدنيا: لولا أن أضع جبهتي لله كل يوم خمس مرات، أو أجلس في مجالس مع أخوةٍ لي في الله ينتقون أطايب الكلام كما ينتقى أطايب الثمر، وأن أغزو في سبيل الله عز وجل»... خدوا بالكم من كلماتكم ..نقوها..اختاروا أجملها ..أصدقها ..أنقاها .. الكلمة اللي بتخرج ما بترجعش تاني .. و وجعها بجد ..ما بيتصلحش تاني .الخلاصة:- شكرا لكل واحد عارف قيمة الكلمة و بيحترم كلمته- لكل واحد عارف الفرق بين الصراحة و الوقاحة - للي مابيحدفش طوب و يقولك انا صريح- للي بيوزن الكلام و يفكر فيه قبل ما يقوله- شكرا لكل واحد قدر يريح قلب حد بكلامه - الف شكر للناس اللي لسانها بينقط عسل#من_القلب_الى_القلب #كلمات_ليست_كالكلمات #مسافر_عبر_الحروف #طه_حسينTaha Hussein
تسهيلاً على زوارنا الكرام يمكنك الرد من خلال تعليقات الفيسبوك
|
|