موضوع: قواعد التلقيح المريح السبت مارس 04, 2017 1:47 pm
قواعد التلقيح المريح ه
خلينا نتفق أن من أهم مميزات الفيسبوك إنك بتقول كل اللي في قلبك بدون تحفظ أو خوف ..بترميها و تجري زي ما بنقول .. و أن عدد كبير من مستخدمي الفيسبوك بيستخدموه لأغراض أخرى غير التواصل الإجتماعي ..
اللي أهمها على الإطلاق هو التلقيح ..هذا الى جانب عدد لا بأس منه من أبراج المراقبة .. و المحللين النفسويين .. و المتفرجين لغرض مصمصة الشفايف و الخوض في أعراض خلق الله أو ندب حظهم و القر على باقي المخاليق
ما علينا.. خلينا في الجانب الأغلب و الأكثر متعة تغلب أحيانا متعة الفوازير و الكلمات المتقاطعة .. ألا و هو ((التلقيييييح)) ..
و علشان فكرة التلقيح تفي بالغرض و تكون مفيدة و مجدية .. فيه شوية قواعد و إرشادات أحب انوه لها .. لعل و عسى أفيد حد من السادة الملقحين .. و أهو كله بثوابه ه 1- لما تحب تلقح على حد حاول تكون محدد على قد ما تقدر .. ليه ؟؟ علشان اللي على راسهم بطحة كتير أوي و ممكن تزعل ناس ما تكونش قاصدهم .. و اللي تقصدهم يعملولك لايك و يقولولك اة والله عندك حق ه
2- التلقيح فن مش عن عن .. و يختلف نوع التلقيح على حسب الغرض .. لذا لازم تحدد هدفك بدقة قبل القيام بعملية قذف الجبهة أو توجيه الطلقات ههه.. بمعنى اذا كان للفت الإنتباه بغرض (أنا هنا هنا يا إبن الحلال) يختلف عما إذا كان لأغراض تقطيمية من منطلق ( حس بيا يحس بيك ربنا ).. أو بين الأزواج نظام (إتقي ربنا فيا ).. أو بغرض التوجيه لتصرف معين نفسك فيه بدون جرح لكرامتك .. أو التشهير بشخص بغرض الإنتقام .. أو بأة التحذير و التوعد نظام إتلم و إحترم نفسك .. أو دعا على ظالم و مفتري .. أو عايز تقول لحد انا فقستك و عرفت اللي فيها فبلاش أنا ههه
3- تعقيبا للنقطة رقم (1) .. فيه ناس عندهم إحساس إن الكون كله بيدور في فلكهم هه .. و أي كلمة بتتقال من أي حد يبقى هما اللي مقصودين بيها .. لدرجة إنهم يقعدوا يغلوا في نفسهم كدة و يتشالوا و يتحطوا و يبتدوا يفكروا في رد مناسب (و اللي دايما بالمناسبة بيطلع غير مناسب و ساذج ).. و هما يا ولداه لا في بال اللي كتب و لا في دائرة رؤيته أصلا .. حقيقي أشفق عليهم من صدمتهم لما بيكتشفوا بعد فوات الأوان انهم ليسوا بالأهمية اللي فاكرين نفسهم بيها .. نصيحتي (ما تاخدوش كل حاجة على صدركم .. فيه ناس بتحب الكلام للكلام .. مش كل كلمة تتقال تحسسوا على بطحتكم ) ه
4- ساعات بنبقى منتظرين رد فعل معين لتصرف أو كلمة أو موقف .. و مستنيين الشخص دة يقول حاجة معينة في دماغنا .. دة بيخلينا حساسين بزيادة لأي بوست أو كوميكس أو حتى فيلينج .. و الموضوع فعلا ابسط من كدة .. اللي عايز يقول حاجة هيعرف يوصلهالك بطريقة ما .. اللي مش باله أو البعيد جبلة ما بيفهمش .. ماتضيعش وقتك و لا تركيزك معاه
5- اذا كنت من هواة التلقيح لازمن و لابد تكون على استعداد المواجهة إذا تم سؤالك مباشرة من الشخص الملقح عليه (إنت تقصدني انا !!؟؟) .. ماتبقاش ملقحاتي و جبان
6- تاني مرة عشان البيه .. وحياة أغلى الغاليين .. بلاش نظام اللي على راسه بطحة .. مش كل ما حد هيعطس يبقى يقصد يتف ف وشك .. الرحمة !!!!
7- اذا كان يعني و لابد منه و الكلمة خلاص محشورة و لازم تطلع .. خليك ذكي .. ماتبقاش ملقحاتي و أهبل .. يعني ما تتكلمش عن الفضيلة و إنت فيك كل العبر ..
و ما تتكلمش عن الدين و إنت تاكل مال النبي .. و ما تتكلمش عن الأدب و الأخلاق و إنت و كل اللي يعرفوك بما فيه اللي بتلقح عليه عارفين أصلك و فصلك .. بمعنى آخر (اللي بيته من إزاز ما يحدفش الناس بالطوب )
8- نصيحة اخيرة بأة .. سيبوا شغل التلقيح دة للنسوان الفاضية .. أو للعيال اللي لسة فرافير صغننين بيخافوا يواجهوا .. بجد بتبقى وحشة أوي لما بتطلع من ست كبيرة محترمة و لا راجل وقور كدة المفروض برضه انه محترم 9- مفيش احلى من المواجهة و الكلام المباشر .. صحيح فيه حاجات كتير ممكن تمنعنا إننا نصرح بحقيقة مشاعرنا و رغباتنا .. بس مما لا شك فيه إن أقصر طريق بين نقطتين هو الخط المستقيم
10- اخر حاجة بأة .. بصراحة البوست دة الهدف منه التلقيح المباشر على شوية ملقحاتية و انا زهقت من تلقيحاتهم المفقوسة و العبيطة .. يمكن يبطلوا تلقيح و كدة