طه حسين تاريخ التسجيل : 27/05/2009
| موضوع: لله في لله كده الأحد مارس 19, 2017 11:43 am | |
| لله في لله كتير بنقابل ناس نرتاحلهم أول ما نشوفهم.. نحس إننا نعرفهم من زمان ... تفتحلهم قلبك و تلاقي روحك مرتحالهم .. الناس دي ممكن يكونوا لا من دينك و لا جنسيتك و لا جنسك أصلا .. بس فيه حاجة كدة بتشدك ليهم .. لله في للهوناس تانية سبحان الله تحسهم بيقفوا في الزور.. دمك بيتغير و روحك بتقفش .. تحس مرة واحدة بخنقة و إنك مش طايق نفسك و لا المكان اللي هما فيه.. بدون سبب واضح ..و لا أي سابق معرفة و لا خبرة و لا أي حاجة .. مش طايقهم لله في للهدة على فكرة حقيقي جدا .. مش جنون و لا دروشة !!قال رسول الله صل الله عليه وسلم (الأرواح جنود مجندة ما تعارف منها ائتلف و ما تنافر منها إختلف ) .. هي دي بأة اللي بنفسرها بـ: (لله في لله (عادي جدا إنك ترتاح أو تقفل من حد بمجرد ما تشوفه ..أو إن تصرفاته ما تلدش عليك ..ماتبلعهاش ... أياً كان إحساسك ناحيته اللي هو (لله ف لله) ..لمجرد إن أرواحكم تنافرت و إختلفت ... بس اللي مش عادي إن دة يكون مبرر لظلم و غبن الشخص دة بدون أي سبب مقنع غير إني مش حابه ..أو مش عاجبني !!!طبيعي أن يبقى لينا عدة دواير تبتدي واسعة تشمل المعارف و الزملاء و غيرهم من العلاقات السطحية ..و تفضل تضيق تضيق حسب درجة المعرفة و القرب و المحبة ... بس اللي مش طبيعي إننا نعمل دايرة واحدة و نقفلها و يبقى اللي مش صاحبي و حبيبي ..عدوي و إبن ستين تيييت ..و يستاهل اللي يجراله ..(ماهو مش صاحبي بقى )...مش صح أبداً إني أتنازل عن حيادي و أخلاقي و مبادئي لمجرد إن دة بحبه أو دة مش عاجبني .. لازم نفصل بين الأهواء الشخصية و بين المواقف الحياتية و التصرفات الواقعية ..صحيح مش بإيدنا نحب ناس أو مانحبهمش .. بس بإيدينا نظلمهم و نجرحهم بكلامنا ...أو نديلهم حقهم و نرد عنهم الظلم .. طالما إحساسك أصله لله في لله .. يبقى خلي تعاملاتك كلها لله في لله .تخيل كدة تدخل لدكتور يهمل في تشخيصك لإنه مش مرتاحلك !!! ... أو محامي مايذاكرش القضية كويس و هو عارف إنك مظلوم علشان مش لادد عليه !!.. ولا ظابط يكروت محضر البلاغ علشان شكلك مش عاجبه!! .. هبل و عبط و حاجة كدة تدل على سذاجة و سطحية الشخصية ..الحقيقة المؤلمة اللي إكتشفتها مؤخراً .. إن القدرة على التعامل بحيادية بغض النظر عن الأهواء الشخصية مش سهلة أوي لكل الناس .. تكتسب بالوقت و أحيانا كتير بالخبرة في العمل .. و دة اللي بنسميه ال Professionality أو الحرفية ..طيب و اللي ماشتغلش ؟؟؟ بسيطة ..تقدر تشتغل على نفسك .. قليل من العقل و المعرفة و الكثيييير من الهدوء النفسي و السلام الداخلي .. وقتها بس هنبقى أكثر حرفية و نضوج في التعامل و نستوعب إن عدم حبنا للشخص مش مبرر لظلمه .. هنعرف نفصل ما بين رغباتنا وتصرفاتنا في حكمنا على الأشخاص و إتجاهاتنا ... وبين ما يجب أن يكون .حقيقي .. كل ما الإنسان قدر يوصل لمرحلة النضوج العقلي كل ما قدر يفصل ما بين الصح والغلط ..وبين الأهواء الشخصية ..بين المبادئ التي لا تتجزأ وبين الرغبات الداخلية التي تدعونا لدعم أو ظلم أشخاص لمجرد إني حاببهم أو كارههم لله في لله!!!!الخلاصة: - حبة منطق - كرهك مش مبرر - إعط لكل ذي حق حقه - حبيبك يبلعلك الزلط #من_القلب_الى_القلب #كلمات_ليست_كالكلمات #مسافر_عبر_الحروف #طه_حسين Taha Hussein
تسهيلاً على زوارنا الكرام يمكنك الرد من خلال تعليقات الفيسبوك
|
|