الكوسة
للكوسة ف بلادي شئون
بتخللي المسنود فرعون
يتفرعن فين مهما يكون
و تخللي الجاهل أستاذ
و الأعور لاعب جمباز
و تخللي الأحول هداف
و الكورة الآوت في الجون
للكوسة في بلادي شئون
لو تعرف واحد في الشرطة
راح تخرج من أجدع ورطة
و الراجل اللي إنت ضربته
تلاقيه متلقح مسجون
أو تعرف شخصية كبيرة
شغالة في البنك مديرة
راح تاخد من غير ضمانات
كام قرض بمليون مليون
و هروبك طبعا مضمون
و يا عيني لو تعرف نايب
في المجلس مش نايب خايب
راح تبني أبراج وهمية
أوراقها مضبوطة أكيد
و فلوس الناس المهرية
حتجيلك م الجيب للإيد
بعديها تروح المستشفى
و تقيد نفسك مجنون
أحكامك تسقط في ساعتها
بعديهاترجع موزون
و يا عيني لو تعرف شيخ
فجنابك طاهر على طول
و صيامك طبعا مقبول
و إذا فرضا حبيت تتجوز
تتجوز من غير مأذون
و إذا ساكن في عمارة جديدة
و حبيبك راجل مسئول
فسيادتك من غير ما تقول
يركب لك طبعا تليفون
و لو إنت عندك عربية
و نمرها سودة بنسرين
حتعدي اجدعها كمين
و حتكسر أمنعها إشارة
ما هي نمرك سودة جبارة
و لا تعرف أيتها قانون
و إذا كنت بتعرف فران
أو واحد بياع جرنان
راح تاخد طلبك و حتمشي
من غير و لا دوشة و لا دور
و الناس الغلبانة حتاخد
طلباتها بعدك و تغور
ما هو كله غيرك بيهون
و إذا كنت زميل الحلاق
راح تحلق أولها زبون
و إذا كنت بتعرف دكتور
حتعيش مطمن مسرور
و حتسلك ف لجان الشفوي
و مجال تعيينك موفور
و حتطلع في التليفزيون
بالبدلة و فيها الببيون
تتكلم و بكل بساطة
عن شرف المهنة المدفون
لكن لو شاعر غلبان
قلت اللي ف نفسك على طول
حيقولوا مين قالك قول
و يهاجمك مليون إنسان
و التهمه إنك فنان
مش بردو كلامي يا جدعان حاسينه
و ألا أنا غلطان ؟؟!!!
مش معنى كلامي يا أحبابنا
إن إحنا خلاص إتغربنا
فيه فينا أشراف و كتير
إتربوا على حب الخير
و إحترموا ولادهم و الغير
و الناس إحترمتهم و اللـــه
الفاتحة على روحهم ياللا