كلام مهم عن الكميات و السعرات في الدايت النباتي

كذا حد سأل عن كميات الأكل والسعرات

الفكره في النظام ده، إن لأن كل أكله تقريباً سعراته منخفضه، فتقدر تاكل منها زي مانت عايز، من غير ما تتجاوز السعرات الحراريه اللي أنت محتاجها، فتخس…
حتى الرز والمكرونه والبطاطس مافيهومش سعرات مرتفعه زي ما إحنا فاكرين…الرز المسلوق فيه 130 سعر لل100 جرام، وكذلك المكرونه المسلوقه، والبطاطس المسلوقه أو في الفرن فيها حوالي 90 سعر لل100 جرام.
فأنت مهما أكلت من الحاجات دي، هتاكل إيه يعني؟؟…كيلو رز؟؟…دول 1300 سعر بس!!
كيلو مكرونه؟؟…1300 سعر برضه.
يعني أقل من ال2000 أو 1500 اللي أنت محتاجهم عشان تخس (على حسب طولك ووزنك وسنك ونوعك ومعدل نشاطك).
الخضار فيه سعرات أقل كمان من النشويات…يعني الخس ال100 جرام فيه 15 سعر!!…الجزر فيه 40، الكوسه 17، الطماطم 18!!
كل منهم فدان لو عايز.
البقول اللي فيها سعرات أقل حاجه بسيطه من النشويات…العدس 116 سعر لل100 جرام..البسله فيها 81، الفاصوليا البيضا فيها 140.
فكل الحاجات اللي ذكرناها دي، تمام، مهما أكلت منها صعب تعدي سعراتك اليوميه (لكن مش مستحيل، خصوصاً لو مش بتاكل خضار).

نيجي بقى للكام حاجه اللي لازم ناكلهم بحساب

الفاكهه…والفاكهه مش لأن فيها سعرات كتير قد ما لأن فيها سكر كتير…طبعا فيه حاجات سعراتها كتير زي الموز 100 سعر للموزه الواحده، والبلح اللي فيه 282 سعر لل100 جرام…لكن حتى العنب والبطيخ (وأيوه دول سعرات مش عاليه العنب 67 سعر والبطيخ 30!) وباقي الفواكه، مشكلتهم الرئيسيه إن فيهم سكر كتير…فيعلوا السكر ويشغلوا البانكرياس فوق طاقته…عشان كده، المعقول من الفاكهه عو من 10% ل 15% من مجموع سعراتك اليوميه.
المكسرات…دي بحساب قوي قوي…لأن ال100 جرام on average فيه 600 سعر..فكبشه واحده تطلع لها 50 جرام كده كفايه قوي في اليوم.
الحاجه الكمان في رأيي هي العيش.
الرغيف على حسب وزنه ومعمول بدقيق قد إيه، فيه أكتر من 200 – 300 سعر…مش دي بس المشكله..المشكله إن العيش ممكن ناكل منه كتير قوي..يعني ممكن نسرح في رغيفين الصبح ورغيفين الضهر..والعيش ده غالباً مش بتاكله حاف، ولا بتعمل سندويتشات خيار…الأغلب بتاكله بفول، أو عدس أو بطاطس…ودول أصلاً فيهم سعرات مش قليله، فده بيخلي الموضوع يفرط منك.
الحاجه اللي فاضله هي بدائل الألبان…دول سعراتهم كتير، ولو عملت بولة شوفان غرقانه مثلا لبن لوز، هاتبقى سعراتها عاليه جداً، وأنت فاكر إنك فطرت فطار خفيف وعصافيري، وهو في الحقيقه جزء كبير من سعرات يومك!!
فالأحسن تخلي بدائل الألبان دي، على قد الشويه الصغيرين اللي بتحطهم في الشاي، أو إنك تحط شويه على الصوص عشان يبقى أتقل.
فاللي إحنا قولناه ده معناه الواضح، إن اللي هياكل خضار من أبو سعرات قليله ده كتير…هيملا بطنه زي ما هو عايز، وبتكلفه أقل في السعرات من اللي هيملاها مكسرات أو نشويات بس..وهيشوف نتايج أحسن على الميزان، وكمان جسمه هياخد فوايد أكتر بكتير لأن الفايده كلها في الخضار.

ملاحظه مهمه

ماحدش يقعد يحسبها بالورقه والقلم، ده مجرد شرح للتوضيح..وماحدش ياكل أقل من 1200 ل 1500 سعر بأي حال من الأحوال…كل المطلوب تبقى واعي لأكلك، وتعرف لما تبقى مزودها في حاجه، توزنها في الوجبه اللي بعده…والخسسان هييجي لوحده والله.