موضوع: حلزون في الشارع الجمعة ديسمبر 02, 2016 10:35 am
حلزون في الشارع
في كل مكان فى مصر شوارع كتيره ...ما بين شباب بتجري و عجل و ناس رايحة و جاية ...و قطط بتهرب من العيال الرخمة ... في مرة من المرات وأنا بعدي الطريق لمحت حاجة غريبة على الأرض ... حلزون صغنوووون ف نص الطريق ..قعدت شوية أتأمل الحلزون المتهور و هو مكمل طريقه بتركيز و مالوش دعوة بأى حاجة علشان يوصل للرصيف التاني ... فكرت لثواني
يا ترى الحلزون حسبها كويس قبل ما يخاطر كدة ؟؟؟ .. طب ايه اللي يستاهل مخاطرته ؟؟ .. ياترى فيه حلزوناية مستنياة الناحية التانية ؟؟.. ولا أولاده الحلزونييين الصغنططين ؟ .. ولا عنده شغل حلزوني و بيجري على أكل عيشه ؟؟؟؟ ..
إتنبهت إني شاغل الطريق و شكلي غريب أوي و انا مقرفص و متنح علي الأرض مع خلفية موسيقى سر الأرض و حملة إعلانات البلهارسيا بتاعت (إدي ضهرك للترعة ) ... فقررت أحسم الموضوع وأمد يد العون لهذا الحلزون المكافح ...مسكته و عديته ...تخيلته لثواني و هو بيشكرني وحلزونته بتتنطط من الفرحة إنه جه قبل معاده بإسبوع . بس الحقيقة إن أنا اللي مفروض أشكره .. الكائن الضعيف أوي دة إداني درس عظيم...أبدا ما أستصعبش طريق ...مهما كنت شايفه مستحيل .. حاجات كتير لو كنا حسبناها بعقلنا و بالمنطق ماكناش هنستجري نعملها .. بس فيه حاجة عظيمة أوي إسمها التوكل على الله ...سيبها على ملك التدبير ...ماتعرفش أبدا يد المساعدة ممكن تجيلك منين ..الفرج هيجيلك إمتة ؟؟ في اول الطريق ولا نصه ولا اخره ... ولا يعلم جنود ربك الا هو ... هنكون يعني أضعف من الحلزون ؟؟؟ و لا الصعوبات في حياتنا أصعب من قطة بتجري من عيل رخم بيرمي عليها زلط ؟؟؟ أكيد لأ يعني
الخلاصة: - ما تستصعبش طريق - مفيش حاجه إسمها مستحيل - كل واهد يا موهي جواه قوه بتظهر وقت الشده (بصوت جد ليي فى فيلم فول الصين العظيم ☺) - إعقلها وتوكل - مستر حلزون - الحلزون صديقي
الأحداث
موضوع: حلزون في الشارع 
الجمعة ديسمبر 02, 2016 10:35 am
☺)
