::  لسه فاكراني  ::

سألوني عن مهنتي ..؟
قلت أنا شاعر
رص الحروف شغلتي ..
واعرف أنظم كلمتي
أستاذ مشاعر
سكتي مليانة خوف ..
ع الطريق دايما مسافر
خطوتي ف إيد الظروف ..
قبل اما تبدأ رحلتي  ..
وجيت أسافر
كانت ف إيدي أجندتي ..
وفيها رصيت القصايد
والخواطر والحروف
وكتبت عنوان المهاجر
ع الأفيش ..
خرابيش
حرفوش
من الحرافيش  ..
وناديت لبنتي
خلي دي عندك أمانة
يمكن وشوشنا
ماتتلاقيش  ..
ويبقى سيبتلكم أثر
هو إيه يعني البشر  ..
غير حبة حروف
والذكريات برضك حروف
والأسامي والكتب
حبة حروف
ومتخافيش  ..
لو بيينا طال مر الغياب
ومتزعليش  ..
لو قالوا عني
أبوكي مات
إياك دموعك تهزمك
متعيطيش ..
دا العمر مكتوب
بالحساب
كلنا لازم نموت
داري حزنك والعذاب ..
قولي ابويا لما عاش
عاش أسد
ولما مات مات جسد
لكنه عايش ف الكتاب ..
عايش بالمشاعر
والقصايد والخواطر ..
أبويا كان للخير
والحب شاطر  ..
خليكي فاكره
إن انتي واخواتك
ساكنين كياني ..
لما تيجي روحي
مشتاقة لهواكم
وتزور مكاني ..
تلاقيكي فاكراني ..
سهرانة مع كتابي
وحضناني ..
وتشوفك وانتي
عشقاني ..
وتيجي جنبك تحضنك
هتحسي بيها ..
دا انا أجمل قصيدة
في الكتاب كتبتهالك
إبقى افتحيها ..
نفسي روحي تحس إيدك
بين حروفها تعطريها ..
وتشوف عنيكي ع السطور
سرحانة فيها ..
لو دمعة
نزلت من دموعك
يوم عليها ..
والله هافرح
وأتباهى بيها ..
بين جيراني  ..
وأقول دي بنتي
بنت ابوها
ساكنة كياني  ..
حسيت حنانها
مشتاقة لحناني ..
نزلت دموعها
غصب عنها  ..
لسه فاكراني ..
لسه فاكراني ..

~~~~~~~~~~~~~
بقلمي ..
معوض حلمي
منشأة بطاش
تمي الأمديد
دقهلية