: أبويا قالي ع الأصل دور :

على صوت الديك وسامع ..
آدان الفجر ف الجامع ..
كنت ف الأوضه نايم
سمعت رجل
برا الباب بتدبي ..
صحيت ملقتش ستي  ..
كانت نايمة جنبي ..
صحيت زي عادتها بدري ..
راحت  للفرن تحمي ..
وتنادي على امي  ..
يابنتي راح القمر
قومي عجينك خمر  ..
وابويا جاي م الصلا
يلاقيني صاحي  ..
وف حماه إفرد جناحي ..
إيدي ف إيديه
يحلى صباحي  ..
على طول ونسرح  ..
نبدرها خير نزرع ونقلع
واسأله ليه يابويا
يوماتي نسرح  .. ؟
يقولي يابني الأرض
لما تشوف صحابها تفرح ..
والزرع برضه يزيد ويطرح  ..
عمركش شوفت أصيل يميل ..
ويصاحب عويل ..
ولا شوفت قطيع غنم
من غير دليل  ..
علمتني الأرض يابني ..
أبوس خدها بفأسي ..
وارويها بإحساسي ..
تصون عهدي ..
وترد الجميل  ..
وتزيد من الكيل مكاييل ..
وتغلب الكفة ..
وإياك تقول الخسة ..
ف طبع الولد وليدة الصدفة ..
الخسة رضعة لبن
رضعها الولد وهو ف اللفة ..
والأصيل لو جار عليه الزمن
معدنه غالي ..
تلقاه وقت الشدايد سند
لو هو بيعاني ..
~~~~~~~~~~~~~
بقلمي ..
معوض حلمي
منشأة بطاش
تمي الأمديد
دقهلية