""   تعبت خطاوينا   ""

****************

حلمت ان انا
ف حدك ..
هاشوف حسنك ..
واشوف قدك   ..
والآقي الشمس
متحنية من خدك  ..
ومين يقدر
يشوف خدك  ..
ويقولك
دا زي الورد  ..
ولون الورد من خدك  ..
وقلبك بيسقيه شهد  ..
فيطرح نور
وتدور النجمة
حواليكي ..
ياقمراية  ..
وسارحة ف سمايا  ..
رسمتك فرحة جوايا ..
لعمري الجاي ..
ليه روحتي وخدتي
الضي  ..
وسيبتي شوية ذكريات ..
 دا الزمان الباقي منك
ذكريات  ..
والذكريات الباقية منك
شيئ بديع  ..
تملي تيجي بالفرح
زي الربيع  ..
كل اما اروح
للتوتة وحدي  ..
ألآقيها تحكي
بصوت وديع  ..
عن حكاوينا القديمة   ..
وشاهدة على لمسة
إيدينا   ..
والاقيها تسرح
ف الخيال  ..
زي ما تسرح عينينا   ..
لساكي برضه
ياتوتة واقفة  ..
تحكي عنا  ..
فاكرة تنهيدة قلوبنا ..
وقد إيه م العشق
دوبنا  ..
لساكي برضه
ياتوتة واقفة ..
تحلمي بلحظة رجوعنا ..
بعد ماتاهت دروبنا  ..
وتعبت خطاوينا وضعنا ..
وتعبت خطاوينا وضعنا

*****************
بقلمي ..
معوض حلمي
منشأة بطاش
تمي الأمديد
دقهلية