سلسلة مقالات معجزة جيش وشعب رقم 7

سلسلة مقالات معجزة جيش وشعب رقم 7


■■ أعزائى وأحبابى المسافرين معنا على طائرة (( فريق مصر أم الكون )) التاريخيه برجاء ربط الأحزمه وعدم التدخين وأغلاق الموبيلات للأقلاع بالطائره والرحله رقم (( 7 )) والأخ اللى بيأزأز لب هناك فى الدرجه السياحيه جنب الأخت اللى بتطرقع اللبانه ياريت تركزوا معانا شويه أحسن عليا الطلاق أحدفكم من الطياره

■■ توقفنا فى الحلقه السابقه عند ماحدث يوم 5 أكتوبر مساءاً فى أسرائيل واليوم تستعد طائرة الزمن لتقلع بنا لنغوص فى أعماق التاريخ لنستكمل معا ماتوقفنا عنده فأستسمحكم ربط الأحزمه وعدم التدخين وقبل السرد والأقلاع بطائرتنا أرجو بعض الأخوه اللى بتحاول تسبق الأحداث الهدوووء شويه وركز فى الحلقات واحده واحده ومتسبقشى الأحداث ياأما لو مستعجل أتفضل أنزل من الطياره وخدلك توكتوك أسرع

■■ يقول الدكتور مايكل بريشر أن أكثر ماأصاب صناع القرار فى أسرائيل فجر يوم 6 أكتوبر هو أنهم أفاقوا من يقين وهمى أستسلموا له فى آخر ثلاث سنوات ملخصه أن العرب مش حيقدروا يحاربوا وحاول الكاتب ياآيات ياعرابى يالى بتزورى التاريخ على مدار ثلاث أبواب من كتابه صنع القرار فى أسرائيل يشرح لنا كيف وصل الأمر بالقاده الأسرائيلين لهذا اليقين الوهمى لكن أنا ححاول ألخص لك اللى قاله الكاتب فى كتابه فى عدة نقاط جوهريه :

** وفاة جمال عبدالناصر وأعتقاد الأسرائيليين أن الأمور السياسيه مش حتتظبط مع السادات بسرعه ومش حيعرف يسيطر على البلد فى وجود مراكز القوى والأخوان المسلمين

** الصدام المسلح بين الملك حسين أبو الواد نايتى والفلسطنيين فى عامى 1970 و 1971

** إعلان السادات المسرحى أن عام 1971 هو عام الحسم وعدى العام ولم يحدث أى شئ

** الأوضاع السياسيه والأقتصاديه اللى زى الزفت فى الأتحاد السوفيتى ومساعى السوفيت للتوصل لوفاق مع الأمريكيين

** عدم أستعداد سوريا الدخول فى عمليات عسكريه بدون دخول مصر معها فى نفس الوقت اللى مصر فيه أصبحت جثه هامده والسادات أهمل الجانب العسكرى ومركز على الجانب السياسى

** الدراسات والأبحاث المخابراتيه اللى أتعملت على شخصية السادات تثبت أن السادات راجل سياسى أكتر منه رجل عسكرى وبالتالى وبناءاً على مساعيه فهو يبحث عن حل سياسى

** تخلف الطيران العربى كله بربطة المعلم عن الطيران الأسرئيلى كماً ونوعاً وأن العرب لن يفكروا فى حرب إلا بعد مايحلوا المشكله دى (( مكانتشى لسه قطر عندها طيران ومكانتشى أمريكا عملت منها ومن فلوسها خازوق فى الوطن العربى ))

** قرار طرد الخبراء الروس من مصر فى يوليو 1972 وأزاى السادات حيحارب بعد طرده للخبراء الروس وده بيأكد سعى السادات للحلول السياسيه

** أحساس أسرائيل بالتفوق الكمى والعددى والتقنى العسكرى على العرب ده بالأضافه لوجود موانع صناعيه وطبيعيه زى قناة السويس وخط بارليف المنيع وأرتفاع هضبة الجولان ويمكن علشان النقطه دى السادات بعد الحرب ركز على ملاحقة التفوق العسكرى الأسرائيلى ونوع فى مصادر السلاح ومبارك كمل بعده وتوقفت فى عهد المجلس العسكرى والأخوان لمدة 3 سنوات مدخلشى الجيش المصرى فيها قطعه عسكريه واحده جديده والسيسى بيحاول بقدر المستطاع تعويض كل مافات علشان يعمل تكافئ فى ميزان القوى العسكريه فى المنطقه ولو حسبنا بهدوووء كمية السلاح فى المنطقه العربيه وأستبعدنا أسرائيل حنعرف أن المنطقه العربيه أصبحت عباره عن مستودع أسلحه لكن ينقصها العامل البشرى الماهر وده الأهم وده متوفر كويس قوى فى الجيش المصرى ولما تعرف أن قطر تعاقدت بعدك بشهرين على صفقة الطائرات الرافال الفرنسيه لكن لحد النهارده لم تدخل الخدمه لعدم أستيعاب الطياريين القطريين التدريب رغم أن هذه الطائرات دخلت الخدمه فى مصر منذ ثلاث سنوات تقريبا حتقدر تعرف أهمية العنصر البشرى وآسف أنى بخرج بره الموضوع لكن الكلام بيجيب بعضه وعلشان نوضح شويه بناءاً على رغبة البعض من حضراتكم

** الشعور الأسرائيلى بالتأييد القائم والكامل من الجانب الأمريكى

** اللى بقوله ده كان واضح جدا فى خطاب بيجال آلون فى يونيه 1973 فى القدس وقال فيه (( أن العرب ليس لديهم أى خيار عسكرى )) شايف يامؤمن الغرور والغطرسه

** التضارب السياسى فى الوطن العربى وعدم بلورة موقف موحد وأنشغال العرب بقضايا فرعيه ونزاعات فيما بينهم والصراع الفلسطينى الداخلى أو زى مابيقول فريشر فى كتابه العرب مش قادرين يحددوا مين عدوهم وبيخبطوا فى بعض لصالح عدوهم بالأضافه لتضارب مواقف السادات والأسد وعرفات

■■ كل ده يانجم كان فى الآخر بيصب فى عدم تصديق القاده الأسرائيليين أن السادات ممكن يكون راجل جاد فى أتخاذ قرار حرب وممكن اللى بيعمله ده حركات لكى يستوعب حالة السخط الشعبى اللى عنده لكن فاقوا يوم 6 أكتوبر لما أتصل الجنرال شاليف بموشى ديان على تليفون غرفة نومه وأيقظه من النوم الساعه 7 صباحا وهو بيقول له (( الآن تلقينا تأكيدا نهائيا بأن هناك هجوما مصريا سوريا على الجبهتين الشماليه والجنوبيه وأصبح واقع ومؤكد ومصادرنا تقول أن ساعة الصفر ستكون مع آخر ضوء (( طبعا كان موضوع أول ضوء خلاص عدى وبقينا الساعه 7 صباحا يعنى مفيش هجوم دلوقتى ))

■■ نرجع تانى لمصر ونشوف مع بعض السادات عمل إيه فى خطة الخداع السياسى والعسكرى وكلنا عارفين وضع جريدة الأهرام وقتها وعلاقة محمد حسنين هيكل بالسادات ونقدر نقول أن جريدة الأهرام هى الجريده الناطقه بأسم النظام الحاكم ونقول أن كان فيه خبر نزل فى الأهرام صفحه أولى عن الأعلان عن مناورات الخريف التى تقوم بها القوات المصريه وتنتهى يوم 7 أكتوبر وخلى بالك من موعد الأنتهاء

خبر تانى نزل فى الأهرام يوم 3 أكتوبر عن فتح باب التقدم للعمره بين أفراد القوات المسلحه

خبر ثالث برضوا فى الأهرام بيعلن عن زياره هامه ومرتقبه لوزير الحربيه الرومانى لمصر لمقابلة وزير الحربيه المصرى أحمد أسماعيل

خبر رابع فى الصفحه الثالثه فى نفس اليوم عن قرار وزير الحربيه أحمد أسماعيل بتسريح قوات الأحتياطى بعد أنتهاء مناورات الخريف يوم 7 أكتوبر على أن يتم تسريحها يوم 8 أكتوبر

■■ الساده المسافرين وقود طائرتنا قارب على النفاذ ونستأذنكم فى الهبوط لأعادة التزود بالوقود على وعد بلقاء مع #فريق_مصر_أم_الكون

وسيكون معكم ومعهم كالعاده
#جنرال_بهاء_الشامى
تم النشر قبل 20th May 2017
بواسطة Genral Bahaa ELshamy