سلسلة مقالات معجزة جيش وشعب رقم 17


■■ تعلن هيئة ميناء أم الكون الجوى عن قيام رحلتها التاريخيه رقم 17 وعلى الساده المسافرين برجاء التوجه فورا لصالة السفر لسرعة أنهاء أجراءات السفر والتوجه للطائره التاريخيه لفريق مصر أم الكون واللى مش عاجبه الطياره وحالتها مايركبشى ويحصلنا فى توكتوك على حسابه

■■ السيدات والساده نصحبكم فى هذه الرحله لنستكمل ماتوقفنا عنده من رسالة السيد حافظ أسماعيل لهنرى كسينجر فبرجاء ربط الأحزمه وعدم التدخين وأغلاق الموبيلات وعدم أصطحاب الأطفال لأهمية وخطورة هذه الرحله لكن قبل السرد كان فيه نقطه غامضه فى مقال رقم 16 أنى قلتلك أن الرساله بتاعة حافظ إسماعيل نشرت عام 1983 وقلتلك أن نشرها عمل ضجه كبيره وتعالى نشوف الضجه دى كانت ليه ومش عارف أقولك على السبب قبل بداية المقال ويبقى أنا كده أفقدت المقال توازنه الفكرى المضمونى ولا أقولك فى الأول وأنت تربط الدنيا فى بعضها لكن فى الحالتين عاوزك تكون متأكد أنى حكون معاك صادق وحيادى أكثر مما تتخيل ولن يؤثر أنبهارى بعقلية السادات على مجريات المقال

■■ أولا الرساله نشرت بجريدة الأهالى واللى نشرها صلاح عيسى وخلى بالك من الخباثه مع بعض الوثائق الأخرى والرساله تحمل صبغة سرى جدا ومحظور يعنى ممنوع نشرها قبل مرور 30 عام سواء هنا فى مصر أو فى أمريكا ولما حتعرف فى سياق المقال أزاى تعاملت الأداره الأمريكيه مع الرساله حتعرف أهميتها وخطورتها ولما تعرف أن الوثيقه نشرت بعد موت السادات بعامان وفى عهد مبارك ولم يحاسب أى مسئول عن تسريب الوثيقه أو يحاسب ناشرها ولما تعرف أن محمد حسنين هيكل طلع شوه صورة السادات فى تحليله للرساله برضوا فى جريدة الأهالى ولما تعرف أن الرساله أو الوثيقه من وثائق حرب أكتوبر المحظوره قبل أنقضاء المده القانونيه يبقى احنا قدام أحتمالين أما أن اللى حصل من تسريب الرساله وتحليل هيكل لها كان بعلم مبارك والغرض معروف أو أن هيكل بحكم قربه من السادات هو اللى قام بالليله كلها لوحده بغرض تشويه السادات وأظهاره أنه غبى عسكريا وده واضح جدا فى كل تناول هيكل لتاريخ السادات وكتبه عن حرب أكتوبر فيما يتعلق بالسادات ودايما كان بيحاول يظهر السادات أنه ولا حاجه من غير هيكل وأنا السادات مكانشى بيعرف يتحرك من غيره ووصفه للسادات أكثر من مره بالمغرور وأيضا كل ده تم برضى مبارك وعلشان كده نشر الرساله أو الوثيقه عمل ضجه كبيره جدا وقتها وعشاق ومريدى السادات هاجوا وماجوا بسبب نشر الوثيقه وأعتبروا تحليل هيكل لها أهانه وتشويه لتاريخ السادات ... لكن العبد لله حيحاول يفند مزاعم هيكل فى حينه

■■ المهم أول لما وصلت الرساله لهنرى كسينجر وقرأها ولقى أن مضمونها فى الأسلوب مختلف عن الرسائل المصريه اللى قبل كده وطبعا هو عارف أن الرساله من السادات مش من حافظ إسماعيل لكنها موقعه بأسم حافظ أسماعيل كأجراء برتوكولى وتسلسل قيادى فطلب من قسم الحرب النفسيه فى المخابرات المركزيه الأمريكيه سرعة تحليل الرساله والرد فورا وفعلا عكف مجموعه من خبراء وعلماء النفس فى المخابرات الأمريكيه على تحليل الرساله كالآتى :

(( أعذرنى ححاول أتدخل فى التحليل وسيكون تحليلى وتعليقى فيما بين القوسين ))

(( أولا الرساله وصلت لكسينجر عبر القناه السريه للمخابرات الأمريكيه بعكس رسالة كسينجر اللى وصلت بطريق شرعى عن طريق وزارة الخارجيه وأخدت الشكل الرسمى وفى النقطه دى هيكل بيحاول يبرر أن الرساله كانت سريه فقط من حافظ أسماعيل لسفارتنا فى واشنطن علشان يحاول يفهم الناس أنها لم تكن سريه بالنسبه للجانب الأمريكى ويبقى كده مفيش مشكله من نشرها ))

(( برضوا فى النقطه دى ومع دباجه صحفيه بيحاول هيكل يفهمنا أن السادات بغروره لغى السفاره المصريه ولغى وزير خارجيته المتواجد بنيوييورك وتحدث مباشر مع كسينجر بعكس كسينجر اللى تعامل مع السادات من خلال القنوات المشروعه ))

(( برضوا هيكل بيقول أن مضمون رسالة السادات أنه بيتكلم من لغة المنتصر ولم يمر على بداية الحرب 20 ساعه ممكن تنقلب فيها الموازين ونسى هيكل أن فيه مستجدات حدثت على الأرض وفيه تغيير جذرى فى أحداثيات الجبهه المصريه تحديدا وأستطعنا تحرير من 10 كم لـ 15 كم وحطمنا الساتر الترابى وسيطرنا على 50 % من نقاط خط بارليف وقفلنا المضايق وأحكمنا السيطره على باب المندب وكل ده فى العلوم العسكريه نصر ونصر ساحق ومبين فى الفتره الزمنيه القصيره دى وأننا على الأقل نفسيا هزمنا الغرور الأسرائيلى وبقول لهيكل مش معنى الحياديه أنى أقلل من قيمة بلدى وقيمة إنتصارها وسواء كان تحليلك لأرضاء غرورك أو أرضاء مبارك فأعتقد دلوقتى التاريخ بعد مرور 50 عام على الحرب حطك وحط مبارك فى المكان اللى يليق بكم وحط السادات فى المكان الذى يليق به وبأنتصاره وبعقليته ))

■■ نيجى بقى لتحليل المخابرات للرساله :

1 _ {{ أننا لانعتزم تعميق مدى الأشتباكات أو توسيع المواجهه }} فيها أعتراف ضمنى بنوايا السادات ويمكن أعتباره تعهد ضمنى (( برضوا هيكل مسك فى دى قوى وقال مش من المفروض أن قائد عسكرى يعلن عن نواياه لكن الأستاذ هيكل تناسى تماماً أن فيه مخابرات حربيه وعامه عارفه عدد أسلحتك وعارفه مدى المدفعيه عندك أى نعم أحنا جبابره فى أستخدام أى سلاح زى صواريخ سام 6 لكن برضوا الأسلحه لها مدى مؤثر محدد على الأرض ومعانا الخبير العسكرى طارق بيه فتح الله يؤكد كلامى يعنى من الآخر الأمريكان والروس عارفين آخر مدى ممكن يحرره السادات من سيناء والأهم الحفاظ عليه والدنيا كلها كانت عارفه أن السادات آخره 17 كم ))

2 _ التحليل الأمريكى يتكلم عن ثقة السادات فى رسالته وأحساسه بالنصر (( هيكل برضوا مسك فى بعض الكلمات فى الرساله وحاول يقلبها على السادات لما قال أننا مش بنتكلم بلغة الضعيف أو كلمة موقف العجز أو كلمة الأرض الرهينه وبرصاحه تقل العيار فيها على السادات ونسى طبعا أن السادات قال كلمه تقش الكلام كله لما قال تغيرات على الأرض ومن غير المقبول وأحداثيات جديده ))

3 _ التحليل الأمريكى بيقول أن السادات فى النقطه اللى بيتكلم فيها عن مؤتمر للسلام لما قال أو أى شكل مقبول أنه عنده أستعداد لقبول أمريكا كطرف أومشرف مباشر فى حد ذاتها

4 _ التحليل الأمريكى بيقول أن السادات بوصفه عسكريا وسياسيا فى آن واحد سيسهل كثيرا من التفاوض المباشر معه (( هيكل هنا الشيطان ركبه وبيقول أن من حظنا أن كسينجر فهم كلمات لرساله ولم يفهم مضمونها وأنا بقى هنا مش حعلق نهائى ))

■■ اليوم الثانى فى الحرب 7 أكتوبر 1973 وصل السادات تقرير اليوم التانى عن الحرب

العدو :

_ مازال العدو يتمسك ببعض مواقعه مع سقوط موقع كيلو متر 10

_ مازال العدو يدفع بأحتياطياته من العمق

_ هاجم العدو بعض مطاراتنا والتشكيلات البريه وأسقط له بعض الطائرات

_ تم أشتباك بحرى شرق قناة السويس

_ أصدر العدو تعليمات لطائراته بعدم الأقتراب من قناة السويس حتى عمق 15 كم شرقاً

_ ركز لعدو نشاطه على الجبهه السوريه

خسائر العدو :

_ أسقط للعدو 32 طائره مقاتله + 1 طائره هليوكبترا

قواتنا :

_ تم صد معظم الهجمات المضاده

_ قواتنا تتدفق للقناه طبقا للخطط الموضوعه مسبقاً

_ قامت قواتنا البحريه بقصف مواقع العدو فى خليج السويس

_ قامت قواتنا الجويه بقصف قوات العدو المتقدمه أتجاه القنطره (( على فكره فضلت مده طويله القنطره عامله لنا قلق وعملنا فيها بطولات خارقه ))

الجبهه السوريه :

_ وصلت وحدات مدرعه للقوات السوريه على مشارف نهر الأردن وقامت بصد هجوم مضاد لدبابات العدو على طول خط الخشينيه _ عين زيفان

_ دفعت الوحدات المدرعه لأستغلال نجاح النسق الأول (( تقول وثائق حرب أكتوبر العسكريه أن الطيران الأسرائيلى نفذ 1021 طلعه على المواقع المصريه و 3820 طلعه على القوات السوريه ))

_ طيران العدو مكثف على الجبهه السوريه

التحليل :

_ يعمل العدو حاليا على أستعادة السيطره على قواته وإعادة تجميعها ومحاولة توجيه الضربات المضاده ضد رؤؤس الكبارى مستخدما الأحتياطيات التكتيكيه

_ يركز العدو التمسك بموقع بورفؤاد للأرتكاز عليها فى أى أعمال تعرضيه ويمكن توجيهها لمنطقة بورسعيد

_ من المنتظر قيام العدو بتوجيه ضربه جويه مركزه ضد المطارات والقواعد الجويه ووسائل الدفاع الجوى على الجبهه المصريه

_ من المنتظر أن ينشط العدو عملياته الخاصه ضد الأهداف الحيويه فى العمق وضد الأهداف العسكريه المنعزله وخصوصا فى منطقة البحر الأحمر

■■ ده كان تقرير تانى يوم معارك على الجبهتين المصريه والسوريه الذى قدم للسادات ولازالت رحلتنا مستمره لكن كما تعلمون علينا الهبوط للتزود بالوقود لذا نطالبكم بربط الأحزمه وعدم التدخين وأغلاق الموبيلات على وعد بلقاء أن شاء الله مع #فريق_مصر_أم_الكون

كان معهم ومعكم

#جنرال_بهاء_الشامى
في يونيو 06, 2017