كنباوية تضرب كفا علي كف وتقول: الراجل ده فاكرنا عُبط عمال يتحايل علي طلباتنا بمسرحية هزلية ماتخلش علي عيل صغير!!..
كنباوى: خير بس ياكنباوية ؟، راجل مين؟، ومسرحية إيه دي اللي شاغلة بالك؟..
كنباوية : هو فيه غيره مرسي الإخواني ده..
كنباوى: عمل إيه تاني؟..
كنباوية : بيقول إنه هيعمل تغيير وزاري..
كنباوى: وده فيه إيه؟، مش ده كان مطلبكم من الأول..
كنباوية : إحنا كان مطلبنا تغيير الوزارة كلها بقنديل نفسه وتشكيل وزارة من التكنوقراط، مش يضحك علينا زي العيال الصغيرة، ويشيل كام وزير ويحط كام وزير.. ده ضحك علي الدقون وشغل نصب وحواة.. ده استخفاف بعقولنا وعدم تقدير لينا ياكنباوي..
كنباوى: ماتزعليش نفسك هو العوج فيه حاجة تعدله أبدا؟!!!!.
كنباوية : علي قولك ده مش بعيد يكونوا الوزرا دول إخوان والمصيبة إنه هيعمل تجديد وتغيير في حركة المحافظين كمان، طبعا ماهو لازم يحصل كده قبل الانتخابات البرلمانية علشان يضمن اكتساح الإخوان ليها.. دي سياسة يهود..
كنباوى: لأ دي سياسة إخوان، وسياسة الإخوان ألعن من سياسة اليهود..
كنباوية : ده أنا سمعت كمان أنه هيعين البلتاجي محافظا للقاهرة..
كنباوى: ياساتر يارب مالقاش غير السماوي ده يجيبه محافظا للقاهرة.. ده انتقام من القاهريين ده ولا معناه إيه؟ ..
كنباوية : مفيش فايدة فيه، مفيش ده خلاص بيدمر نفسه زي ما دمر سمعة الإخوان.
كنباوى: الناس قبل مرسي وحكمه كانت بتظن الخير والتقوي في الإخوان، لكن دلوقتي حكم مرسي ووصولهم للحكم وصنع القرار أظهرهم علي حقيقتهم منافقين مخادعين انتهازيين وصوليين مايملاش عينهم إلا التراب..
كنباوية : الإعلام لازم يفضح مرسي وعماياله ومايسكتش علي كده..
كنباوى: ومين قالك إن الإعلام هيسكت؟!!، ده من بكره هتلاقيها جنازة والإعلام هيشبع فيها لطم، ده مابيصدق إنه يحط إيده علي أي غلطة لمرسي وفين يوجعك..
كنباوية : يستاهل هو اللي عامل في نفسه كده بتصرفاته وقراراته اللي مش مدروسة إلا من ناحية واحدة بس، هي ناحية مصلحة الإخوان..
كنباوى: لأ وده كمان زعلان، وقال في حواره علي قنا الجزيرة إنه مش راضي عن اللي بيسخروا منه وبيتطاولوا عليه، وهو صابر عليهم وإن ده عيب.. طيب اللي هو بيعمله فينا ده مش عيب؟..
كنباوية : هو الإخوان بيعرفوا العيب، لو كانوا بيعرفوا العيب ما كانوش باركوا جمعة تطهير القضاء، والتطاول علي قضاة مصر.. لكن تقول إيه بجاحة بعيد عنك..
كنباوى: علي قولك دول ناس أو جماعة وشها مكشوف وعيارها فالت.. ماهي باضت لهم في القفص بفوز محمد مرسي برئاسة الجمهورية في الانتخابات..
كنباوية : إحنا اللي ولاد كلب اللي انتخبناه ضحك علينا بدقنه وورعه وتقواه..
كنباوى: راح فين الورع ده دلوقتي وراحت فين التقوي؟..
كنباوية : خدهم الغراب وطار أو أقولك خطفتهم الحداية، وطالع بسلامته يغني علينا في قناة الجزيرة..
كنباوى: بس تعرقي صوته مش حلو، فريد الأطرش صوته أحلي منه..
كنباوية : فريد الأطرش مين؟، ده صوت عباس فارس أحسن منه قال فريد الأطرش قال إيش جاب لجاب البلبل للغراب!!..
كنباوى: الله يحظك ياكنباوية ضحكتيني وأنا ماليش نفس أضحك..
كنباوية : ليه ياسبعي مالكش نفس تضحك؟..
كنباوى: علشان إنتي زعلانة ومتضايقة..
كنباوية : ربنا مايجيب زعل ياكنباوي، أنا زي الفل أهه وهاقوم أحضر الأكل..
كنباوى: عاملة لنا إيه النهارده ياكنباوية ؟..
كنباوية : فضلة خيرك عاملة محشي كرنب وورق عنب ولحمة محمرة وشوربة لسان عصفور وملوخية خضرا..
كنباوى: إيه ده كله إيه ده كله..
كنباوية : ده كله من خيرك يارجلي كلوا وانبسطوا ولا حد يقدر يعكنن علينا أبدا ولا حتي مرسي..
كنباوى: علي رأيك بكرة يمشي ونرتاح منه ومن تصرفاته..
كنباوية : آمين يارب آمين ..
الأحداث
موضوع: كنباوى وكنباوية.. التغيير الوزارى الجديد وغنّى يا فريد!! 
السبت أبريل 27, 2013 5:28 pm
