جيش المكرونه والكعك !!

القوات المسلحه المصريه
جيش المكرونه والكعك !!
______________________
أيوة الجيش بيعمل مكرونه وكمان رز وبطاطس وفراخ ولحمة وسمك ومربى وزيوت وبسكويت وجبنة.
أيوة الجيش عمل كحك وغريبه وبتي فور كمان.
أيوه الجيش بيزرع قمح ورز.
أيوة الجيش عنده أبار مياه وعنده مصنع مياه معدنيه.
أيوة الجيش بيعمل ملابس وعنده مصانع ملابس واحذيه.
أيوة الجيش النهارده مش جيش 73 لانه احسن وافضل.
أيوة الجيش عنده مصنع اسمنت.
ّّّّّّّّّّ~~~~~~~~~~~~~~~~~~~~~~~~~~~~~~~~
* عزيزي ‫#الكولجى عزيزي ‫#الخروف عزيزي ‫#‏الناشت_الحكوكي ‬ خلاص ارتاحت ؟ طب ممكن احكيلك قصه ممكن أبوك وامك يفتكروها ؟

- أيام الحرب من 67 وحتي 73 كانت الاسره المصريه بتتحصل علي فرختين في الشهر فقط مهما كان عددها 2 او 10 وساعات كتير ماكانش فيه لا فراخ ولا لحمه ولا لبن والشعب كان راضي وساكت وكان كل اللي في مخازن وزارة التموين موجهه للمجهود الحربي يعني للجيش سواء سكر - زيت - رز - مكرونه - الخ الخ وحتى الطوب والأسمنت كانوا موجهين للجيش وكان الفائض من استهلاك الجيش يوزع علي الشعب .. فاهم الحال كان ازاي ؟!
دلوقتي بقى العكس ,, الجيش بينتج أكله وشربه وكسوته وكعكه وبيتيفوره وبيبيع الفائض للشعب وبأسعار اقل وبيكسب ويصرف علي نفسه وانت مش حاسس ولا متأثر اقتصاديا بكده .
تيجي انت وبدل ما تسأل امك وابوك عن تاريخ جيش بلدك وعمل ايه لامك وابوك وليك شخصيا تتريق وتتنطط عليه علشان بييبعلهم اكل بأسعار أقل من اسعار السوق ؟
عمرك سمعت عن المقوله العسكريه " الجيوش تمشي علي بطونها " ؟ دي كنايه عن ان الجيش الجائع لا يتمكن من القتال ,, وهاتسمع فين ياحسرة وانت اخرك تسمع مهرجانات او جاستن بايبر او بلاك ميتال !!
طب ما تيجي نفكر كده في الوضع ,, الجيش المصري بيحارب في سيناء من عام واكثر وفي حاله حرب معلنه وحاله تعبئه شبه عامه في الجيش الثاني .
الجيش المصري بيحارب لضبط الامور في ليبيا وعدم انتقال الصراع إلى داخل مصر حتى لا تصبح ليبيا / سوريا / عراق / يمن أخرى وتبقي حدودنا مهدده اكتر ما هي مهدده أصلا دلوقتي.
حسيت انت أو حد من اهلك حس بنقص في السلع الغذائيه نتيجه حاله التوتر والعلميات العسكريه دي ؟؟ زي ما كان بيحصل ايام الحرب زمان ؟
حسيت انك خايف وانت نايم ان تسقط عليك قذيفه من اي بلوه تموتك انت وامك وابوك زي غزه و العراق وسوريا واليمن وليبيا ؟
حسيت وانت قاعد علي النت جوه بيتك ان ممكن ناس تكسر بيتك وتعدم اهلك لمجرد انك مش علي ملتهم ؟
حسيت وانت بتشتم الجيش انك في يوم هتحتاج جيش بلدك اكتر من حاجتك لامك وابوك وانك دلوقت بتهدم فيه ؟
لا طبعا مش معقول تحس بكده لانك لاغي دماغك وماشي مع قطعان الغنم اللي ماشية.
لمجرد ان رئيس البلد كان قائد للجيش اللي خلع مرسي ولمجرد ان الجيش وقف مع مطالب الناس اللي نزلت ولو كانت حتي 2 مليون بس بقيت بتستموت في إنك تنشر شائعات عن الجيش وتشتم فيه وتخليه مادة للسخرية في اي كلام واي مناسبة ووصلت وساخة وبجاحة جزء من القطيع اللي انت ماشي معاه انهم يشمتوا ويفرحوا في موت مجند او ضابط من الحيش ومش بعيد تكون واحد منهم مانت عادي جتتك نحست وماعادش بيجري في عروقك نقطة من الاحمر.
على فكرة عادي جدا تكون معادي للرئيس ومعارض له وعادي جدا تنتقد أخطاء او سلبيات من الجيش نفسه لأنه مش ملايكة يعني ,, كل ده حقك ,, لكن مش من حقك تهدم جيش بلدك اللي بيحمي امك وابوك وبيحميك وافراده بيستشهدوا على الحدود في الشرق والغرب وفي شمال سيناء وانت قاعد في المكيف او تحت المروحة آكل شارب نايم ولا حاسس بحاجة واخرك بتجاهد على الكيبورد بكلمتين ,, مش من حقك تنشر أكاذيب وشائعات عن جيشك وتساعد على شق الصف في وقت احنا في أمس الحاجة فيه لوحدة الصف الوطني وتماسك وتكافت الجبهة الداخلية لدعم الجيش ضد الخطر اللي بقى محاصرنا من كل ناحية ,, بس برضه الجهاد على الكيبورد أهم مش كده ؟!
لو انت عايز تهدم جيش بلدك يبقي احسنلك تروح تقف على الجنب التاني من الحدود وترفع السلاح على جيش بلدك وصدقني ده ساعتها هايبقى اشرفلك واكرملك -ده لو اصلا عندك ذرة كرامه وشرف- من انك تكون داخل بلدك وتهدم جيشك من ظهره .
أفتخر أني احب جيش بلدي وافتخر اني اعشق كل من يحمل السلاح ويدافع عني وعن اهلي كلهم ,, أفتخر إني اتشتم ويتقال عليا عبد للبيادة -وأنا عبد لله الذي لا إله الا هو- وأتكفر كمان وماله كله يهون عشان جيش بلدي بس المهم انت وامثالك ماتحققوش اللي في بالكم ابدا .