فى ذكرى ميلاد أبويا الله يرحمه
9/11/1949


فى ذكرى عيد ميلادك مش عارف إيه أهديك

غير دعوة ليك بالرحمة رحمة الله عليك

فاكر قوى كلماتك وأنا طفل بين إيديك

نصايحك وانا ببص لك وشايف صورتى فى عنيك

كنت طفل صغير ومش فاهم حاجه فى الدنيا

كنت دايما تقولى دى الدنيا دى فانيه

وسمعت منك كلام مفهمتهوش وقتها

لكن آن الأوان نعيد للأجيال سردها

هكتب لكل الحبايب اللى قرأته فى دفاترك

هكتب فى ذكرى ميلادك وفى كل يوم فاكرك

أبويا كتب زمان زجل نصيحة حياة
بيقول فيه بعد ما نوحد الله



يا اللى انت ناوى تعيش مرتاح وفى ظل رب كريم هتكون

وتعيش سعيد مسا وصباح إسمع نصيحة خالق الكون

يا إبن أدم صح النوم لحد إمتى تعيش فى ضلال

عن المعاصي توب لك يوم وإرجع عن الفعل البطال

الدنيا ليه صبحت لهياك مع إن هم الدنيا كتير

أهملت فى حقوق اللى نشاك وصورك أحسن تصوير

وغير كده خلقك من طين وميزك بالعقل كمان

وكل ده وانت يا مسكين أهملت فى حقوق الرحمن

مانتاش فاكر فيه جنة ونار ولا أنت فاكر يوم هتموت

الدنيا شغلاك ليل ونهار لكن يومين والدنيا تفوت

الدنيا مش هتتشفع فيك ولا ينفعكش غير أعمالك

عملك صحيح اللى هيحميك والدنيا مهيش ديمالك

الدنيا زى السوق مظبوط فيها بضايع وتجارة

اللى طلع كسبان مبسوط واللى طلع قال يا خسارة

يا إبن آدم يا مسكين خد لك مواعظ من نفسك

تنزل من أمك طفل جنين من بطنها مطبق كفك

بتعيش فى الدنيا ضعيف وانت لسه صغير مولود

ووقت ما عمرك يخلص وتموت بيكون كفك مفرود

معناها يعنى طلعت نظيف نفضت إيدك من الدنيا

رايح تقابل رب لطيف وخرجت من الدنيا الفانيه



زجل بعنوان نصيحة الحياة لوالدى رحمه الله وأسكنه فسيح جناته

لـ : #حسين_طه_حسن_العوضى

نسألكم الفاتحه على روحه والدعاء له بالرحمة والمغفره

ربنا يخليكى يا ماما هنا
الله يرحمه كان بيهوى كتابة الزجل وله كتابات كتيره جدا
انا حافظها عن ظهر قلب
محفورة جوايا من صغرى
الله يرحمه ويسكنه فسيح جناته