 طه حسين  تاريخ التسجيل : 27/05/2009
 |  موضوع: صور شير افضحهم !!!!  الإثنين أكتوبر 24, 2016 10:04 am | |
| صور شير افضحهم !!!! زماااااان...كانت الجرايد لما تحط صور مجرمين أو مُدانين ( مش مشتبه فيهم ) كانت بتعمل مستطيل اسود كدة على العين ..
و لما بتكتب اسماء كانت بتكتفي بالحروف الأولى .. ليه ؟؟؟ علشان كانت فيه حاجة اسمها جريمة التشهير يعاقب عليها القانون ... كان التشهير جريمة .. كان فيه حاجة اسمها حفاظ على السمعة و احترام الخصوصية ..
كان فيه حاجة اسمها ميثاق شرف .. كان فيه حاجة اسمها عيب و احترام للناس .. و دة كان لمين ؟؟؟ للمجرميندلوقتي اي مخلوق معاه موبايل بكاميرا اعطى لنفسه الحق انه يصور اي حد ف اي حتة اي وقت من غير ما يعرف ..
و ينشرها و يكتب عليها اللي عايز يكتبه .. قذف محصنات .. تشهير .. كدب .. فضيحة .. قذف الناس بالباطل .. هتك سر ..تتبع عورات ..
أهو نضحك شوية و نتريق .. كلمتين سخاف علشان الناس تضحك و تشير .. !!!ايه الفرق بين حد منزل صورته الشخصية و هو ماسك ازازة بيرة مثلا و بيقول ( الليلة يا سمرا الليلة ) او متصور مع واحدة ف وضع مخل و كاتب (احبيني بلا عقد ) .. و بين حد قاعد على الكورنيش مثلا هو و نفس البنت و ماسك نفس الإزازة في حتة متدارية لوحدهم ..
و شخص جميل لذوذ حبوب راح مصوره من ضهره من غير ما يقوله و كاتب (آدي شباب الجيل .. شير و افضحهوهم ) !!!!!؟؟؟؟؟؟الإتنين غلطانين أينعم ..
بس الأولاني اللي هو جهر بالمعصية و قال انا حلو و عاجبني حالي و طز ف الكل .. الناس سقفتله و قالت حرية شخصية ..
و التاني اللي كان مستخبي من عيون الناس و بيقول استروا عليا .. فضحتوه و قولتوا اللي مايشتري يتفرج .. !!!!فرق كبير بين الجهر يا سادة سواء رافض أو متفق .. و بين واحد بيتستر و بيستخبى و هو بيعمل المعصية .. فرق الفضيحة و التشويه ..
فرق انك بتصعب عليه الرجوع ..
فرق هتك الستر و الحد من انتشار الرذيلة ..
حكمة الستر و تحريم الجهر (كل أمتي معافى الا المجاهرين) هي الحد من انتشار المعاصي ..
لما بيكون عندك حد مريض بتعزله علشان المرض ما ينتشرش .. مش بتحطه وسط الناس و تقول العيان اهو !! ..كلنا بنغلط و بنراجع نفسنا و بنتوب ..
كلنا نفسنا بتحدثنا بالسوء و المعاصي .. بس بنخاف ..و بنيجي عند نقطة بنتراجع ..
إحساسك بإن الكل بيعمل المعاصي بيجرأك عليها ..
اللي كان نفسه و خايف بيقول اهو غيري بيعملها ..
بيتشجع و يجاهر بيها هو كمان و هلم جرا .. و مع الوقت .. بيفقد الخطأ تصنيفه .. و العين تاخد عليه ..
و يبقى هو دة العادي و الصح و غير كدة تبقوا ناس معقدة و مقفلين و دقة قديمة !!!يا ناس يا محترمة .. يا راقيين يا متطورين .. يا كريمة المجتمع .. ياللي مفيش زيكم ..
- عيب تصوروا موظفين بيشتغلوا في مكان عملهم علشان مظهرهم مش عاجبك و تتريق عليهم .. منهم امهات و آباء ..عيب
- عيب تصور ستات مكافحات نازلين يركبوا مواصلات من ضهرهم علشان تتريق على شكل جسمهم !!
- عيب تصور ناس نازلين البحر او قاعدين في مصيف او ماشيين ف الشارع او راكبين مواصلات او اي حتة علشان تتريق على لبس او جسم او شكل او سلوكيات ..
- عيب تشهر بناس و تفضحهم و هما كانوا بيقولوا يا حيطة داريني ..
- عيب تدخل بيوت الناس و تصورهم بدون علمهم ..
- عيب تبقى معزوم ف فرح او حفلة خاصة و تقوم مصور اللي فيهم و تفضحهم ..و اللي بيقولك احنا عايزين المصلحة و نكشف الواقع و الكلام الحلو المتزوق دة .. بخمسة جنيه مجلة ماتزوقيني يا ماما هتلاقي مليووون طريقة تقدر تخبي بيها وش الناس ..طالما همك اوي السلوك و كدة ... و نيتك بفتة بيضة و زي الفل !!!!!إتقوا الله .. إتقوا الله .. إتقوا اللهيَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ وَلا تَجَسَّسُوا وَلا يَغْتَب بَّعْضُكُم بَعْضًا أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتًا فَكَرِهْتُمُوهُ وَاتَّقُوا اللَّهَ إِنَّ اللَّهَ تَوَّابٌ رَّحِيمٌالخلاصة:
- خليها تقف عندك
- ماتشيرش
- لا تتبع عورات الناس
- كما تدين تدان #من_القلب_الى_القلب#كلمات_ليست_كالكلمات#مسافر_عبر_الحروف#طه_حسينTaha Hussein
تسهيلاً على زوارنا الكرام يمكنك الرد من خلال تعليقات الفيسبوك
|
|
