 طه حسين  تاريخ التسجيل : 27/05/2009
 |  موضوع: لون أخضر فى بلكونتي  الإثنين أكتوبر 24, 2016 11:56 am | |
| لون أخضر  من فترة جبت ف بلكونتي زرع ... جبت بذور ريحانة و فل و ياسمين و ورد بلدي .. كنت بصحى كل يوم الصبح بلهفة أشوف البراعم اللي إتفتحت و الوردة اللي كبرت ..وأتفرج على الفروع اللي بتنبت ورق جديد ..أشم أريجها ..وأسقيها .. أحسها بترقص مع قطرات المياه اللي نازلة ترويها ..
أنضف اوراقها و أتأمل جمالها و رقتها .. و ازاي رغم ضعفها قادرة تشق الأرض و تثبت جدورها و تعلى ..
بقيت اخاف ان يوم غبت تدبل او توقف تزهر ... كإنها اديتني هدف تاني للحياة .. بقيت اراقب الورق اللي بيصفر و الورق اللي بيزهزه... وأزعل على اللي بيموت و يقع ..
و بفرح لما الاقي مكانه فرع جديد بينبت ..حياة ماليانة نبض من سكات .. بتحكي مليون حكاية من غير صوت .. بهدوء .. إزاي الطبيعة كريمة و عطاءة كدة !!؟؟..
على قد ما بتديها حب وإهتمام .. بتديك فرحة و خير .. بهجة و سعادة ..
حسيت ساعتها اني كنت حارم نفسي من نعمة كبيرة ... انا إزاي مازرعتش من زمان !!!!؟؟؟..
فجأة إتمنيت اني أعيش ف مكان كله خضرة و زرع ..أملى عيني باللون الأخضر بس .. أشم ريحة الحياة بس ...
عرفت ليه أنا عمري ما حبيت الصيد و لا إستهواني أبدا ..
فهمت ليه عمري مالقيت متعة في إني أخرج روح من مكانها ..
عرفت ليه طباع السواحلية غير طباع الفلاحين ..
الإختلاف بين ثقافة الموت و الحياة ..
بقيت بحمد ربنا ان الزرع حوالينا ف كل مكان .. علشان يدي لكل واحد مننا درس .. من غير ما يحس .. على قد ما بتدي بتاخد .. على قد ما بتهتم بتفرح .. على قد ما بتراعي التفاصيل على قد ما بتستمتع .. حياتنا و حياة الحوالينا زي الزرع ..تأملت حكمة ربنا انه خلقنا من طين .. جدور و فروع .. و لكل واحد مننا له حكاية و طبع.. اللي ورق بس .. و اللي زهرته بريحة تملى المكان و اللي زهرته شكل و بس .. و اللي بيطرح ثمر و اللي بيضلل .. اللي بتتسند عليه و تنام و اللي يقوي ضهرك و تستخبى وراه
..
بس كله بيجتمع ف حاجة واحدة .. كله محتاج إهتمام و رعاية و حب .. كله علشان يعيش محتاج إنك تاخد بالك منه .. تحس بقيمته .. تحبه .. لإنك شئت ام أبيت .. ماتقدرش تعيش من غيره ..الإهتمام هو روح الحب ... و الحب هو روح الحياة
الخلاصة:
- جرب تزرع
- إتعلم ثقافة الحياة
- إزرع فرحة في القلوب
- إزرع بسمة على الشفايف
- إزرع طاقة حب حواليك
- إزرع بهجة للروح
- أحصد جنة على الأرض #من_القلب_الى_القلب#كلمات_ليست_كالكلمات#مسافر_عبر_الحروف#طه_حسينTaha Hussein
تسهيلاً على زوارنا الكرام يمكنك الرد من خلال تعليقات الفيسبوك
|
|
