::  دفة إيديها صولجان  ::

ستي حمده
كات أميرة
بغصن بان ..
دفة إيديها
صولجان  ..
وكات شراع
والريح جبان ..
وكات سفينة
تساع مافينا  ..
وتعدي بينا
للأمان   ..

ستي حمده
كات محبة  ..
نظرة عنيها
كات دليل  ..
كات نسمه
سارحة
ف حضن ليل  ..
كانت مرايتي
وضحكتي
وحلمي الجميل  ..

ستي حمده
كات جناح  ..
يحمينا من
برد الشتا   ..
كانت دوا
يداوي الجراح ..
ولما يجي
الصيف مباح ..
تبقى سحابة
ف السما  ..
تجري وتفرد
ضلها    ..
ف غيطان
براح ..

ستي حمده
كات
زي وردة  ..
لأ  ..  لأ
الوردة
كانت زيها  ..
واخدة الجمال
من حسنها  ..
واسألوا النسمة
اللي سارحة
كانت تغير  ..
وكتير تميل
على خدها  ..
وتشيل عبير
من عطرها ..
وتسرح بعيد ..

ستي حمده
كات زي عيد ..
كات نبض سارح
ف الوريد ..
لما كنت
احتاج لها
وشوقي يزيد  ..
كنت باستهبل
ساعات   ..
واعمل مريض  ..
عشان تأخذني
ف حضنها  ..
مانا برضو
حته منها  ..
وهى برضو
حته مني  ..
واسمع حنين
من قلبها  ..
واصل لقلبي  ..
يهمس يقولي
ياولد ولدي  ..
ياأغلى شيئ
ف الدنيا عندي  ..
يانن عيني
وروحي مني  ..
الود ودي
ياكبد ستك ..
أشيل
بدالك التعب
وانت سلامتك  ..

ستي حمده
أجمل عيون
حست ودادي ..
لما كانت
ساعة عصاري  ..
تيجي وتقعد
قصادي  ..
كنت اشوف
طيبة عيونها ..
كان قلبها
م الحقد فاضي ..
كات زي طير
سارح وشادي  ..

ستي حمده
كات زي
نوار الأراضي ..
ستي حمده
كات زي
نوار الأراضي ..

~~~~~~~~~~~~~
بقلمي  ..
معوض حلمي
منشأة بطاش
تمي الأمديد
دقهلية