: مصيرنا رباط وبيجمعنا  :

مش هاكتب أحلام وردية
وبلادي تموت من غير دية
أنا بلدي قوية وعفية

بلد امي وابويا وعمي
وترابها المعجون من دمي
تلاعبني ويمكن تلاوعني
وتزعل لو شيئ يوجعني
انا شعبي وهاكتب عن همي
وهاعبر عن ناسي وأهلي

بصراحة والراحة ضمير
مش هافتح ودني
للقال والقيل
أنا هافتح عيني وهاشوف
وهاصور ع المكشوف
أصل الفايدة ف التصوير
مش هاوصف فيها فقير
ولاهاشتم حتى وزير
أنا هاكتب عن شعب
كل الشعب محتاج لضمير
محتاج للنخوة لاجل يغير
ويطير ع المصنع
ومكن واقف نفسه يدور
علشان يصنع
والعجلة تدور
وندور ف رحاب الساقية
نزرع نقلع
نروي الأرض
والبنت عروسة بتتوضا
فاردا الأحلام بالطول والعرض
ماده إيديها وتتمنى
بخضار الأرض وتتحنى
لاجل خدودها ماتنطق عفه
وتطرح شهد
ويجي عريسها ويطلب إيدها
والأم تزغرد م الفرحة
وترش الملح وتحميها
من عين حسادها
وتغزل توبها خيوط من ورد
لاجل ماتصنع بإيديها الطارحة

وآدان ع المدنة بينده خير
بينادي ف خلق الله والطير
لاجل نصلي الفجر ونسعى
ورزق الفجر ف علمه وفير
نصبر على بعض ونهدى
ونقرب من بعض كتير
بالحب ونرجع إيد واحدة
نتحدى النوة ف بحر خطير
ليه نبعد وتزيد أوجاعنا
ليه نقسى ومن غير تفكير
وخلافنا يغرق مراكبنا
وانا وانت بيجمعنا مصير
ومصيرنا رباط وبيجمعنا
أنا وانت وليوم الدين  ..
ومصيرنا رباط وبيجمعنا
أنا وانت وليوم الدين  ..
~~~~~~~~~~~~~
بقلمي  ..
معوض حلمي
منشأة بطاش
تمي الأمديد
دقهلية