رسالة إلى روح خالي الحبيب



(  يوسف أحمد هلال )
رحمة الله عليه

::   قلب الملاك   ::

 لما  قالوا  الواد  لخاله
أنا خدت من خالي جماله
وقلبي قال الخال دلال  ..
ألف رحمة ونور ياخال
وحشتني وعز السؤال  ..
غمضت عيني لاجل اشوفك
قالتلي عيني ياخال محال  ..
قوم ياواد انظم حروفك
عيش حقيقة مش خيال   ..
ولما جيت انظم حروفي
عشان اشوفك  ..
لقيت حروفي ميسرة
نظمت سيجال     ..
قالت مربع توصفك
لكن مربع ضحكتك
طاغي الجمال  ..
واشتاق يوماتي لطلتك
وحالي حال  ..

وطلعت أدور ف الوشوش
على ضحكة تشبه ضحكتك
ضحكة ملاك  ..
لكن فاشوش كل الوشوش
لبست رتوش قناع هلاك  ..
أو قلب فيه من رقتك
نسمة هواك  ..
ولا قلب يشبه رقتك
ولانسمتك مرت هناك  ..
لكن محال وميت محال
حروفي تقدر توصفك
أو وش ممكن يشبهك
وش الطيابة راح معاك ..
ألف رحمة ونور ياخال
وحشتني وعز السؤال
وحشتني  .. وحشتني
وواحشني فيك قلب الملاك  ..
~~~~~~~~~~~~~
بقلمي  ..
معوض حلمي
منشأة بطاش
تمي الأمديد
دقهلية